Azərbaycan, Bakı, 18 iyul/ Trend , müxbir İ.Xəlilova/ Avropa Komissiyası 2008 -ci ilin payızınadək ölkədə investisiya iqliminin yaxşılaşdırılması və ixracın dəstəklənməsi üçün 3 mln. avro məbləğində Azərbaycana texniki yardım layihəsinin reallaşdırılmasına başlayacaq. Bu barədə cümə günü Aİ-nin Texniki Yardım Proqramlarının (Tacis) Azərbaycan üzrə Koordinasiya bürosunun icraçı direktoru Rüfət Məmmədov məlumat verib. Bu layihə Avropa Komissiyasının 2006 -cı il iyunun 15-də təsdiq etdiyi 2006 - cı il üçün Fəaliyyət Proqramına daxil edilib, lakin layihə üzrə maliyyə memorandumu ötən il imzalanıb.
Məmmədovun sözlərinə görə, artıq texniki tapşırıq imzalanmaya hazırlanıb və sentyabr-oktyabrda məsləhətçi seçilə bilər.
Ölkədə investisiya iqliminin yaxşılaşdırılması layihəsi çərçivəsində yardım Tacis-in Azərbaycanın İxrac və İnvestisiyaların Təşviqi Fondu (AZPROMO) ilə işinin davamı olacaq.
Layihə çərçivəsində Azərbaycanda portfel investisiyalarının tətbiqi və inkişafı üzrə dövlət strategiyasının hazırlanması nəzərdə tutulur ki, bu da, öz növbəsində, qiymətli kağızlar bazarı iştirakçıları ilə işləməyi, qanunvericiliyin təkmilləşdirilməsini nəzərdə tutur. Bununla yanaşı, qiymətli kağızlar bazarının korporativ iştirakçıları, həmçinin, fiziki şəxslərlə işdə praktiki əhəmiyyətə malik Bakı Fond Birjası da cəlb olunacaq.
Layihə iki-üç ilə hesablanıb.
2006-cı il üçün 19 mln. məbləğində müəyyən edilən büdcənin mənimsənilməsindən sonra, Azərbaycanda Tacis xətti ilə layihələrin dəstəklənməsi başa çatacaq. Bundan sonra Avropa Qonşuluq Proqramı (ENP) çərçivəsində ölkəyə yardım göstəriləcək.
İyulun 18 -nə olan cari məzənnə - 0,8058 AZN/USD.
Müəlliflə əlaqə saxlamaq üçün elektron ünvan: [email protected]
