Azərbaycan, Bakı, 05 avqust/ Trend , müxbir İ.Xəlilova/ 2008 - ci ilin birinci yarısında Azərbaycanın dövlət büdcəsinin mədaxil hissəsinə 4 809,7 mln. manat daxil olub ki, bu da ÜDM-in 26 faizini təşkil edir. Bu barədə çərşənbə axşamı hökumətdən məlumat veriblər. Büdcənin gəlirləri, ötən ilin analoji dövrü ilə müqayisədə, 86,3 faiz (2582,3 mln. manat) artıb.
Büdcə daxilolmalarının əsas hissəsi (60,5 faiz və ya 2912 mln. manat) Vergilər Nazirliyi tərəfindən təmin edilib. Vergi proqnozları 108 faiz icra edilib. Dövlət büdcəsinə vergi ödəmələri 49,2 faiz artıb (ötən ilin birinci yarımilində daxilolmalar 1951,9 mln. manat səviyyəsində olub).
Dövlət Gömrük Komitəsi proqnozu 100,3 faiz yerinə yetirərək, büdcəyə 563,9 mln. manat ödəyib ki, (ümumi büdcə gəlirlərində xüsusi çəkisi 11,7 faiz) bu da ötən ilin müvafiq dövrü ərzində ödəmələrdən 53,8 faiz çoxdur.
Dövlət büdcəsinin məxaric hissəsi 2007-ci ilin yanvar-iyunu ilə müqayisədə, 79,2 faiz artıb və 4094,6 mln. manat təşkil edib. ÜDM - də xərclərin xüsusi çəkisi 22,1 faiz olub.
Bununla yanaşı, sosial müdafiə və təminata çəkilən xərclər 26,3 faiz artaraq 411,6 mln. manat, səhiyyə - 121,3 mln. manat (31,3 faiz), təhsil - 383,9 mln. manat (27,9 faiz), mədəniyyət, incəsənət, bədən tərbiyəsi - 55,7 mln. manat (50,5 faiz), hüquq-mühafizə və prokurorluq orqanları - 186,4 mln. manat (24,2 faiz) təşkil edib.
Dövlət büdcəsi hesabına ölkə iqtisadiyyatına yatırılan sərmayələrin ümumi həcmi 2,7 dəfə artaraq 2048,9 mln. manat təşkil edib. Onlardan sənaye, tikinti və faydalı qazıntılara - 1781,6 mln. manat (artım 2,8 dəfə), nəqliyyat və rabitəyə - 33,8 mln. manat (86,7 faiz), mənzil-kommunal təsərrüfatına - 49,1 mln. manat (70,5 faiz), kənd təsərrüfatı, balıqçılıq, ətraf mühitin mühafizəsinə - 80,4 mln. manat (26,4 faiz) yönəldilib.
Birinci yarımil ərzində əməkhaqqı fondunun maliyyələşdirilməsi üçün 994,5 mln. manat xərclənib ki, bu da büdcə xərclərinin 24,3 faizini təşkil edir.
Büdcə profisiti 715,1 mln. manat və ya ÜDM-in 3,9 faizini təşkil edib.
Avqustun 5-nə olan cari məzənnə -- 0,8096 AZN/USD.
Müəlliflə əlaqə saxlamaq üçün elektron ünvan: [email protected]
