...

Ləğv edilmiş Azərbaycan-İran sığorta şirkətinin müştəriləri özlərinə başqa sığortaçı seçiblər

Biznes və iqtisadiyyat xəbərləri Materials 15 Sentyabr 2008 17:31 (UTC +04:00)

Trend-i buradan izləyin

Azərbaycan, Bakı, 15 sentyabr/ Trend , müxbir Ü.İsmayılova/ Ləğv edilmiş Azərbaycan-İran sığorta şirkəti Azer-Asia-nın portfelinin digər sığorta şirkəti BE&G-yə verilməsi korporativ müştərilərin istəyi ilə olub, - bazar ertəsi ləğv edilmiş şirkətin İdarə Heyətinin sədri Qəmbər Suvanverdiyev deyib.

"Azer-Asia-nın korporativ müştəriləri, əsasən, BE&G ilə işləyən banklardır və onlar şirkətlə işlərindən razıdırlar, buna görə də onlar belə qərar qəbul ediblər", - Suvanverdiyev bildirib.

Suvanverdiyevin sözlərinə görə, korporativ müştərilərlə danışıqlar aparıldıqdan sonra, onlar özləri, əvvəllər də nəzərdə tutulduğu kimi, müqavilənin şərtlərini dəyişmədən BE&G-də sığorta edilmələrinə hazır olduqlarını bildirdilər.

BE&G sığorta şirkəti şərh verməkdən imtina edib.

"Təsisçilərin oktyabrın 7-də keçiriləcək növbəti iclasında tərəflər Səhmdar Cəmiyyət kimi qalacaq və sığortadan başqa digər fəaliyyət növü ilə məşğul olacaq şirkətin gələcək taleyini həll edəcəklər", - Suvanverdiyev qeyd edib.

Azer-Asia SC-nin məhz hansı fəaliyyət növü ilə məşğul olacağı hələ ki, məlum deyil.

Ləğv edilmiş Azərbaycan-İran sığorta  şirkəti Azer-Asia-nın təsisçiləri müqavilə şərtlərini dəyişmədən portfelin digər sığorta şirkəti BE&G ASC-yə verilməsi barədə qərarı ötən həftə qəbul ediblər.

Sığorta fəaliyyəti ilə bağlı lisenziyanın ləğvindən sonra Azer-Asia təsisçiləri portfelin satılması haqqında mayda bəyan ediblər. Şirkətin 17 minə yaxın fiziki və 60 korporativ müştərisi var və onların hamısı polislərinin satışı haqqında məlumatlandırılıb.

Azer-Asia avqustda sığortaçılara və şirkət əməkdaşlarına borcların qaytarılması üçün öz təsisçilərindən 300 min manat tələb edib. Şirkətin kapitalında tərəflərin pay iştirakına uyğun olaraq, borcun 51 faizini azərbaycanlı təsisçi, 49 faizini isə İran tərəfi ödəyəcək.  

Azərbaycanın Maliyyə Nazirliyi fevralda Azer-Asia birgə sığorta şirkətinə  2002-ci il noyabrın 21-də verilmiş lisenziya fəaliyyətinə dair lisenziyanın müddətinin uzadılmasından imtina edib. Lisenziyanın uzadılmasından imtina edilməsinə əsas, şirkətin 2006-cı il oktyabrın 1-dən 2007-ci il oktyabrın 1-dək olan dövrdə sığorta qanunvericiliyinə və lisenziya tələblərinə uyğunluq fəaliyyətinin yoxlanılmasının nəticələri olub. Yoxlamanın gedişində pozuntu faktları aşkarlanıb. 

İranın Asiya Sığorta (49 faiz) və AzərSığorta (51 faiz) kommersiya şirkətinin təsisçiləri olduğu "Azər-Asiya" birgə sığorta şirkəti, Azərbaycanın sığorta bazarında 1997-ci ildən fəaliyyət göstərib.

1998-ci ildən fəaliyyət göstərən və bu ilin fevralında lisenziyasını uzatmış BE&G şirkəti 28 növ sığorta xidməti göstərir. Onlardan dördü icbaridir. Şirkətin Nizamnamə kapitalı 800 min manat təşkil edir.  

Xəbər lenti

Xəbər lenti