Azərbaycan, Bakı, 08 oktyabr / Trend , müxbir E.İsmayılov/ "Post-sovet məkanında yeganə olan "Nəqliyyatın intellektual idarəsi" sisteminin Bakıda yaradılması layihəsinin ilkin dəyəri $62-63 mln. təşkil edir", - Azərbaycanın nəqliyyat nazirinin müavini Musa Pənahov çərşənbə günü bu layihənin realizəsinin başlaması ilə bağlı mərasimdə bildirib. Layihə Cənubi Koreyanın SK C&C konsorsiumu tərəfindən hazırlanıb.
Layihənin realizəsinin vacibliyi ondan ibarətdir ki, bu sistem insanlara nəqliyyatda vaxt itkisini daha da azaltmağa, hərəkəti nizama salmağa, nəqliyyat sistemində gərginliyi boşaltmağa imkan verəcək.
"Bu o demək deyil ki, sistem ideal olacaq. Yolda müxtəlif hadisələr baş verə bilər. Lakin bütün bunlar məhz bu mərkəzdən idarə ediləcək", - Pənahov bildirib.
Onun sözlərinə görə, layihənin realizəsinin ilkin dəyəri $76 mln, vergilərsiz isə $62-63 mln. təşkil edir.
Artıq Nəqliyyatın İntellektual İdarəsi Mərkəzinin binasının tikiləcəyi yer müəyyənləşdirilib - bina Heydər Əliyev prospektində, keçmiş Keşlə Maşınqayırma Zavodunun ərazisində yerləşəcək. "Artıq Nazirlər Kabinetinin bu sahənin ayrılması haqqında sərəncamı var", - Pənahov bildirib.
Nəqliyyat Nazirliyi ilə imzalanan sazişə əsasən, Bakıda Seulda Şəhər Nəqliyyatı Mərkəzinə analoq olan Nəzarət Mərkəzi (dispetçer mərkəzi) yaradılacaq.
SK C&C artıq öz nümayəndəliyini Azərbaycanda qeydiyyatdan keçirib. Hazırda şirkət layihənin ətraflı layihələndirilməsini hazırlayır. Birinci mərhələdə mərkəz Bakını, perspektivdə isə Abşeron yarımadasını əhatə edəcək. Ətraflardakı qovşaq nöqtələrində fibriooptik kommunikasiya sistemləri çıxışları hesabına mərkəzin təsiri Abşeron, Xırdalan, Sumqayıt, Gəncəyə qədər genişləndiriləcək. O, həmçinin şəhərətrafı və şəhərlərarası daşınmalarla əlaqədə olacaq ki, bu da elektron biletlər sisteminə keçməyə imkan verəcək.
Araşdırmalara əsasən, belə sistemin tətbiqi nəticəsində işıqfor və avtobus dayanacaqlarının sayı nizamlanacaq. Körpü və piyada keçidlərinin tikintisi nəticəsində onların sayı artıq azalıb. Bu sistemin yaradılması avtonəqliyyat vasitələrinin hərəkəti, sürəti, dayanacaqlar, nəqliyyat qəzaları, tıxaclar və digər hallarda mərkəzi dispetçer məntəqəsinə operativ məlumat göndərməyə imkan verəcək.
Nəqliyyatın intellektual idarəsi sisteminin iki mərhələdə 3,5 il ərzində yaradılması nəzərdə tutulur.
Bakıda belə sistemin yaradılmasında məqsəd bir məntəqədən nəqliyyat sisteminin - sərnişin daşınmaları, avtomobil marşrutlarının, tıxacların təcridi, ləğvi və dayanacaqların idarə edilməsindən ibarətdir.
Müəlliflə əlaqə saxlamaq üçün elektron ünvan: [email protected]
