Azərbaycan, Bakı, 19 oktyabr / Trend müxbir N.İsmayılova/ Azərbaycanda oktyabrın 1-dək rəsmi qeydiyyatda olan işsizlərin sayı 44,74 min nəfərdir. Dövlət statistika komitəsindən bildiriblər ki, qeydiyata duranlardan 2,19 min nəfəri işsizlik üzrə müavinət alır. Cari ilin əvvəlindən sentyabr ayınadək işsizlərin sayı 11,4 faiz azalıb. Bir vakant yerə 3 işsiz namizəd var.
2008-ci ilin ötən dövründə işləyən əhalinin sayı 4,04 milyon nəfərdir. Onladan 1,39 milyon nəfəri muzdlu işçilərdir.
Muzdlu işçilərin 13,3 faizi sənaye sahəsində, 5,2 faizi tikintidə, 2,7 faizi kənd və meşə təsərrüfatlarında məşquldurlar.
Xidmət sahəsində isə işçilərin 24,9 faizi təhsil sahəsində, 19,6 faizi ticarət və məişət xidməti sahələrində, 9,9 faizi səhiyyə və sosial xidmət sektorlarında, 6,8 faizi nəqliyyat və rabitədə, 6,1 faizi kommunal xidmətdə, 5,1 faizi daşınmaz əmlakla bağlı əməliyyatların həyata keçirilməsində, 3,9 faizi dövlət idarəçiliyi və müdafiə sistemlərində, 2,5 faizi başqa sahələrdə məşquldurlar.
Cari ilin ötən dövründə Azərbaycanda işləyən əcnəbi vətəndaşların sayı 5 minə çatıb. Onlardan 1,5 mini sənayedə, 1,3 mini tikintidə, bir mini daşınmaz əmlakla bağlı əməliyyatların həyata keçirilməsində, 0,5 mini ticarətdə məşquldurlar.
İşsizlik üzrə müavinətin orta məbləği 122,5 manatdır.
Məqalə müəllifi ilə əlaqə ünvnanı: [email protected]
