Azərbaycan, Bakı, 20 oktyabr/ Trend , müxbir S.Babayeva/ Avropa Yenidənqurma və İnkişaf Bankı (AYİB) Azərbaycanda ən iri sement istehsalçısı Garadagh Cement - in istehsal gücünün genişləndirilməsi layihəsinin maliyyələşdirilməsində iştirak edə bilər, - şirkətin Baş direktoru Xoriya Adrian bildirib.
"AYİB- in layihənin maliyyələşdirilməsində iştirakı mümkündür və bununla bağlı danışıqlar aparılır", - Adrian bildirib.
Layihəyə mövcud sement zavodunun 80 faizinin yenidən qurulması və zavodda yeni soba quraşdırılması daxildir.
Şirkət rəhbərinin sözlərinə görə, 2011-ci ildə yeni soba quraşdırıldıqdan sonra, müəssisədə sement istehsalının illik 1,7 mln. tonadək artırmaq mümkün olacaq.
Garadagh Cement-in əsas səhmdarı olan Holcim Group-un Direktorlar Şurası ötən ilin sentyabrında Garadagh Cement zavodunun 300 mln. avro dəyərində yenilənməsi layihəsini təsdiqləyib. Holcim Group layihə üçün sərmayələrin böyük hissəsini öz üzərinə götürəcək.
İsveçrənin Holcim şirkəti Garadagh Cement-i 1999-cu ildə özəlləşdirib. Garadagh Cement-in səhmlərinin 69,4 faizi Holcim-ə, 10 faizi Avropa Yenidənqurma və İnkişaf Bankına, 10,6 faizi kiçik səhmdarlara, 10 faizi Azərbaycan İnvestisiya Şirkətinə məxsusdur.
Müəlliflə əlaqə saxlamaq üçün elektron ünvan: [email protected]
