Azərbaycan, Bakı, 18 noyabr/ Trend , müxbir Ü.İsmayılova/ "İsveçli iş adamları Azərbaycan iqtisadiyyatının energetika, səhiyyə və kənd təsərrüfatı sahələrində əməkdaşlıqda maraqlıdırlar", - İsveçin məşğulluq naziri Sven - Otto Littorn çərşənbə axşamı Bakıda bildirib.
"İsveçin iş adamları Azərbaycan iqtisadiyyatının neft və qeyri - neft sektorlarında işləməyə hazırdırlar. Lakin bu zaman başlıca məsələ onların fəaliyyətinin ətraf mühitə zərər vurmamasıdır", - nazir bildirib.
Littornun Bakıya səfəri çərçivəsində, noyabrın 19-da Azərbaycan - İsveç biznes - forumu keçiriləcək. Skandinav nümayəndə heyətinin tərkibində 15 şirkətin nümayəndələri təmsil olunacaq.
Nazirin sözlərinə görə, İsveç nümayəndə heyətinin tərkibinə tibb, məsləhətlər və enerji sahələrində çalışan şirkətlərin nümayəndələri daxildir.
İki ölkənin iş adamlarının əvvəlki görüşü, Azərbaycan - Norveç - İsveç forumu çərçivəsində, bu il keçirilib.
Azərbaycanın Dövlət Statistika Komitəsinin məlumatına əsasən, yanvar-sentyabr ərzində Azərbaycan və İsveç arasında ticarət münasibətlərinin həcmi 80,11 mln. dollar səviyyəsində olub (idxal - 17,27 mln. dollar, ixrac - 62,84 mln. dollar).
Müəlliflə əlaqə saxlamaq üçün elektron ünvan: [email protected]