Azərbaycan, Bakı, 19 noyabr/ Trend , müxbir Ü.İsmayılova/ "İsveç hökuməti dünya maliyyə böhranının ölkə iqtisadiyyatına birbaşa təsirini gözləməsə də, böhran əleyhinə tədbirlər görür", - İsveçin məşğulluq naziri Sven-Otto Littorn Bakıda bildirib.
"İsveç 90 - cı illərin əvvəllərində ciddi iqtisadi böhran keçirib. Bununla əlaqədar olaraq, hökumət və yerli banklar belə vəziyyətə yaxşı hazırdırlar", - Littorn bildirib.
İsveçdə 90 - cı illərdə iqtisadi böhran siyasi fikir ayrılıqları ilə bağlı baş verib, nəticədə, kredit dərəcələri, demək olar ki, 500 faizə çatıb, iqtisadiyyat isə praktiki olaraq dağılıb. Sərmayələrin, o cümlədən də xarici sərmayələrin artmasına və dünyada İsveç mallarına yüksək tələbat olsa da, yüksək dərəcədə beynəlmiləlləşməsi ilə fərqlənən İsveç iqtisadiyyatı bəzi çətinliklərlə üzləşib: daha çox məhsuldar sahələrin artımı bir qədər azalıb, dövlət büdcəsinin kəsiri, dövlət borcu artıb. İsveçdə əməyin qiyməti dünyada ən yüksək olub, - nazir vurğulayıb.
Onun sözlərinə görə, iqtisadi böhran zamanı İsveçin bankları vəsait çatışmazlığı ilə əlaqədar, hökumətə müraciət etməyə başlayıblar, nəticədə, maliyyə sisteminin antiböhran idarəetmə və tənzimləmə sistemi gücləndirilib və formalaşdırılıb.
Nazir hesab edir ki, digər ölkələrin bankları ilə müqayisədə, İsveçin bank sistemi maliyyə baxımından kifayət qədər sağlamdır. Bununla əlaqədar olaraq, böhranın birbaşa təsiri müşahidə edilməsə də, vəziyyətdən bilavasitə təsir gözlənilir.
Littornun sözlərinə görə, ölkə iqtisadiyyatının 40 faizi xarici ticarətdən asılıdır. Beləliklə, idxalatçı ölkələrdə İsveç mallarına tələbat azalarsa, bu, ölkə iqtisadiyyatına da təsir göstərəcək.
"Bununla əlaqədar olaraq, İsveç hökuməti ölkə iqtisadiyyatının infrastruktur, təhsil və tikinti kimi sahələrinə dövlət sərmayələrini artırır, eyni zamanda, böhran əleyhinə tədbirlər görür", - Littorn bildirb.
Müəlliflə əlaqə saxlamaq üçün elektron ünvan: [email protected]
