Azərbaycan, Bakı, 26 noyabr/ Trend , müxbir N.İsmayılova/ Azərbaycan Beynəlxalq Bankının (ABB) Moskvadakı filialı 2008-ci ildə milli bank mükafatının laureatı olub, - bankın məlumatında bildirilir.
2008 - ci ilin yekunları üzrə, ABB-Moskva "Rusiya iqtisadiyyatının inkişafına nəzərə çarpacaq töhfə vermiş xarici kapitalın iştirak etdiyi bank" nominasiyasında mükafata layiq görülüb.
Məlumatda deyildiyi kimi, bu mükafat ABB-Moskva üçün, təkcə layiqli namizədlər arasından ən yaxşılarını seçən Ekspert Şurası üzvlərinin rəyini ifadə edən yüksək qiymət deyil, həm də Bankın seçdiyi irəliyə doğru ardıcıl hərəkətdə öz ifadəsini tapmış inkişaf strategiyasının düzgünlüyünün növbəti dəfə təsdiqlənməsidir.
Milli bank mükafatının əsas vəzifələri aşağıdakılardır: Rusiyanın bank sisteminin ictimai imicinin artırılması; real bank xidmətləri istehlakçılarına bankın müştəri seçimi üçün obyektiv, sadə və anlaşıqlı oriyentirlərin təqdim edilməsi; bank sisteminə əlavə açıqlıq və şəffaflığın verilməsi; bank sahəsi elitasının formalaşdırılması. Bu mükafat paytaxt və regional bankların Keyfiyyət Nişanıdır. Nominasiyalarda qalibləri, mükafatın Ekspert Şurasının təqdim etdiyi materialları nəzərdən keçirdikdən sonra, münsiflər heyəti müəyyən edir.
Ümumrusiya bankir günündə keçirilən təntənəli tədbirdə Rusiya Federasiyasının bütün hakimiyyət qollarının ali nümayəndələri, sahə rəhbərləri, federal idarə başçıları, Rusiyanın ən iri maliyyə-kredit idarələrinin birinci şəxsləri, görkəmli ictimai xadimlər, alimlər, aparıcı KİV rəhbərləri iştirak ediblər.
Müəlliflə əlaqə saxlamaq üçün elektron ünvan - [email protected]
