Azərbaycan, Bakı, 28 noyabr/ Trend , müxbir Ü.İsmayılova/ Litvalı ekspert Albina Aleksiene Azərbaycan Daşınmaz Əmlakın Dövlət Reyestr Xidmətinə Dünya Bankı ilə birgə həyata keçirilən "Daşınmaz əmlakın qeydiyyatı" layihəsi çərçivəsində hazırlanan daşınmaz əmlakın qiymətləndirmə metodologiyasını təqdim edib. Bu barədə Dövlət Xidmətindən məlumat verilib.
Hesabatda əmlakın qiymətləndrilməsi üçün beynəlxalq praktikada istifadə olunan əsas amillər və üsullar göstərilib.
Ekspertin hesabatında Azərbaycanda daşınmaz əmlakın qiymətləndirilməsi sahəsində cari vəziyyət öz əksini tapıb.
Azərbaycan hökuməti və DB 2007- ci ilin iyulunda daşınmaz əmlakın vahid kadastrı sistemini birgə tətbiq etmək haqqında saziş imzalayıblar. Layihə dörd komponentdən ibarətdir - daşınmaz əmlakın qeydiyyatı; dövlət əmlakının idarə edilməsi və reyestri; baza xəritəçəkmə və torpaq kadastrı; treninqlər, siyasətin formalaşdırılması və layihənin idarə edilməsi. Layihənin dəyəri 38,57 mln. dollar təşkil edir. Bunun 30 mln. dolları DB -nin kreditinin payına düşür. Kredit ehtiyatları, beş il güzəştli dövr olmaqla, 20 il müddətinə ayrılıb
Azərbaycan Daşınmaz Əmlakın Dövlət Reyestr Xidmətinin rəhbəri Arif Qaraşov əvvəllər bildirib ki, ölkədə əmlakın qiymətləndirilməsi sahəsində bir sıra problemlər var və onlardan biri ixtisaslaşdırılmış qiymət təyin edənlərin olmamasıdır.
Məqalə müəllifi ilə əlaqə ünvanı: [email protected]