Azərbaycan, Bakı, 02 yanvar/ Trend / 2009 - cu il yanvarın 1 - dən Azərbaycanın gömrük - buraxılış məntəqələrində yoxlama vaxtının 20 dəqiqəyədək azaldılmasına imkan verən "vahid pəncərə" prinsipinin tətbiqinə başlanıb.
Dövlət Gömrük Komitəsinin rəhbəri Aydın Əliyev əvvəllər bildirib ki, sərhəddən yüklərin keçirilməsi zamanı hər hansı bir pozuntu olmayacağı halda, yüklərin sərhəddən keçidi 20 dəqiqə ərzində həyata keçiriləcək. Bu və ya digər problemlər ortaya çıxdıqda və ya lazımi sənədlər olmadıqda, müəyyən yoxlamalar aparmaq lazım gələcək.
"Vahid pəncərə"nin əsas prinsiplərindən biri yüklərin və nəqliyyat vasitələrinin sərhəddən yalnız bir xidmətin nəzarəti altında keçməsidir. Gömrük orqanları, növündən asılı olmayaraq, hər hansı bir pozuntu aşkar etdikdə müvafiq orqanlarla məsləhətləşmələr aparacaqlar, məsuliyyətin ölçüsü isə, qanunvericiliklə müəyyən olunacaq.
Son vaxtlaradək yüklər sərhəddən keçərkən, Dövlət Gömrük Komitəsi və Dövlət Sərhəd Xidmətindən əlavə, Dövlət Fitosanitar Nəzarət Xidməti, Dövlət Baytarlıq Xidməti, Səhiyyə Nazirliyinin Sanitar Idarəsi, nəqliyyat və daxili işlər nazirliklərinin yoxlamasından keçirdilər.
