Azərbaycan, Bakı, 06 yanvar/ Trend , müxbir S.Babayeva/ Aqrolizinq ASC növbəti kənd təsərrüfatı texnikasını almaq niyyətində olduğunu elan edib. ASC-nin verdiyi xəbərə görə, tender yolu ilə traktorlar üçün 664 ədəd müxtəlif asma kənd təsərrüfatı texnikasının satın alınması nəzərdə tutulur.
İddiaçılar tenderdə iştirak etmək üçün fevralın 5 - dək öz sənədlərini (tender təklifi və tender təklifinin dəyərinin iki faizi məbləğində bank zəmanətindən başqa), fevralın 13 -dək təkliflərini təqdim etməlidirlər.
Tenderdə qalib gəlmiş iddiaçılar texnikanı DDP İnkoterms - 2000 şərtləri əsasında, müqavilənin imzalandığı gündən 60 gün ərzində Aqrolizinq ASC-nini Şirvan və Ucar bazalarına verməlidirlər.
Tender təklifləri iddiaçılar və ya onların Aqrolizinqdəki səlahiyyətli nümayəndələrinin iştirakı ilə fevralın 16 - da açılacaq.
Agrolizing ASC Azərbaycan prezidenti İlham Əliyevin sərəncamına əsasən, 2004 - cü il oktyabrın 23 - də, Kənd Təsərrüfatı Nazirliyinin balansında yaradılıb. Müəssisənin fəaliyyəti müxtəlif kənd təsərrüfatı texnikasının alınması və yerli toraq sahiblərinə lizinqə verilməsi yolu ilə, ölkədə aqrar sahənin və sahibkarlığın dəstəklənməsinin yaxşılaşdırılmasıdır. Bu gün ASC - nin, işğal edilmiş ərazilər istisna olmaqla, Azərbaycanın bütün rayonlarında doqquz regional aqroservis təchizat bazası və 55 aqroservis filialı var.
2005 - 2008 - ci illərdə Agrolizing dövlət büdcəsindən 133 mln. manat alıb. Bu vəsaitdən 76,6 mln. manat kənd təsərrüfatı texnikasının, 7,4 mln. manat texnoloji avadanlıq, 4,9 mln. pestisid və gübrələrin alınmasına sərf olunub.
Bu dövr ərzində 500 - dən çox taxılyığan maşın, 1,5 min traktor, 30 mini - traktor, 120 ekskavator, 4 mindən çox müxtəlif kənd təsərrüfatı texnikası alınıb.
2009 - cu ilin dövlət büdcəsindən Agrolizing ASC-yə, əvvəlki ildə olduğu kimi, 37,5 mln. manat ayrılacaq.
Müəlliflə əlaqə saxlamaq üçün elektron ünvan: [email protected]
