Azərbaycan, Bakı, 07 yanvar/ Trend , müxbir İ.Xəlilova/ Yanvarın 14 -16 - da Bakıda Korporativ Məcəllənin inkişafı üzrə beynəlxalq konfrans keçiriləcək, - Beynəlxalq Maliyyə Korporasiyasının (BMK) Azərbaycanda korporativ idarəetmənin inkişafına texniki yardımın göstərilməsi layihəsindən (ACGP) çərşənbə günü bildiriblər. Tədbirin təşkilatçıları BMK, ABŞ - ın Beynəlxalq İnkişaf Agentliyi (USAİD), Azərbaycanın İqtisadi İnkişaf Naziliyi, Milli Bank, Qiymətli Kağızlar üzrə Dövlət Komitəsidir.
Konfransın keçirilməsinin əsas məqsədi beynəlxalq təcrübəni bölüşməkdir. Bu sahədən olan mütəxəssislər tədbirdə Bolqarıstan, ABŞ, Almaniya, Cənubi Afrika və digər ölkələrdə Koporativ Məcəllənin tətbiqi təcrübəsi ilə tanış edəcəklər. Nəvbəti günlərdə Azərbaycanın dövlət və özəl strukturlarının əməkdaşları üçün seminarlar təşkil olunacaq.
Azərbaycan hökuməti Beynəlxalq Maliyyə Korporasiyasının yardımı ilə Korporativ İdarəetmə Məcəlləsinin iş variantını, korporativ idarəetmə istiqamətində Mülki Məcəlləyə təkliflər hazırlayır. Bunun üçün iqtisadi inkişaf, ədliyyə nazirlikləri, Bakı Fond Birjası, AMB, Azərbaycan İnvestisiya Şirkəti və BMK-nın nümayəndələrindən ibarət işçi qrupu formalaşdırılıb.
Bu dövlət qurumlarının Məcəllənin hazırlanması prosesinə cəlb edilməsi müxtəlif konsepsiyaların təkrarlanmaması və işin birgə aparılması ilə əlaqədardır. Belə sənəd Azərbaycan hökuməti üçün qanunvericiliyin təkmilləşdirilməsində faydalı ola bilər. Belə ki, Məcəllədə ölkə üçün müvafiq metodologiya öz əksini tapacaq. Burada beynəlxalq korporativ idarəetmə standartlarının tətbiqi üçün meyarlar, konkret addımlar göstəriləcək.
Yerli şirkətlərdə koprorativ idarəetmə təcrübəsinin tətbiqi xarici sərmayədarların onlara marağını, ölkənin qeyri - neft sektorunun cəlbediciliyini artıracaq.
Azərbaycanın İnvestisiya Şirkəti də BMK və USAİD - in dəstəyi ilə AİŞ - in sərmayə yatıracağı yerli şirkətlər üçün nəzərdə tutulmuş korporativ idarəetmənin model Məcəlləsini hazırlayıb.
Məcəllə AİŞ - in Müşahidə Şurası tərəfindən təsdiq ediləcək. Gələcək sərmayələr üçün şirkətlərin seçimi zamanı əsas diqqət korporativ idarəetmə standartlarının tətbiqi təcrübəsinin olmasına veriləcək. Məcəllə qüvvəyə minənədək AİŞ BMK- nın dəstəyi ilə hazırlanmış korporativ idarəetmənin aparılmasına dair təlimata əsaslanacaq. Şirkətlərin monitorinqi bu təlimat əsasında aparılır.
Müəlliflə əlaqə saxlamaq üçün elektron ünvan: [email protected]