Azərbaycan, Bakı, 11 fevral / Trend , müxbir Ü.İsmayılova/ "Azərbaycan Milli Sahibkarlar Konfederasiyası (AMSK) ümumdünya iqtisadi böhranının sahibkarlıq fəaliyyətinə təsirinin azaldılması üzrə təkliflər hazırlayıb və hökumətə təqdim edib", - çərşənbə günü konfederasiyanın prezidenti Ələkbər Məmmədov deyib.
"Hazırda təkliflər Vergilər, İqtisadi İnkişaf nazirliklərində, Əhalinin Dövlət Sosial Müdafiəsi Fondunda və başqa qurumlarda müzakirə olunur", - Məmmədov bildirib.
Onun sözlərinə görə, konfederasiya 2009-cu il üçün Sahibkarlığa Dəstək Milli Fondundan ayrılması nəzərdə tutulan kreditlərin həcmini 120 milyon manatdan 1 milyard manata çatdırılmasını, həmçinin kreditlərin verilmə şərtlərinə yenidən baxılmasını təklif edir.
AMSK-nın təklifləri sırasına, həmçinin Milli Fonddan alınmış kreditlər üzrə ödəmələrin dünya böhranı sona çatana qədər ertələnməsi, bəzi hallarda isə, əsasən də sənətkarlıq sektorunda ümumiyyətlə əvəzsiz kreditlərin verilməsi barədə məsələlər də daxildir.
Konfederasiya həmçinin hazırkı sosial vəsait ayırmaları dərəcəsini hazırkı 25 faizdən (22 faiz işverən tərəfindən maaş fondundan, 3 faiz isə işçi tərəfindən ödənilir) 17 faizə endirməyi təklif edir.
Hazırda Azərbaycanda kiçik və orta sahibkarlar vergiqoymanın sadələşdirilmiş formasına cəlb olunublar və son rüb ərzində minimal dövriyyə 2,5 min manat təşkil edib. Məmmədovun fikrincə, bu, çox aşağı göstərici sayılır və biznes həcmini 10-15 dəfə artırmaq lazımdır.
AMSK yerli sahibkarların dövlət tədarükü sistemindəki fəaliyyətinin fəallaşdırılmasını, bununla yanaşı yerli məhsulların maya dəyərinin azaldılması üçün enerji daşıyıcılarının qiymətini 50 faiz aşağı salmağı təklif edir. Bu, ilk növbədə ölkənin aqrar sektorunun inkişafını dəstəkləməyə imkan verəcək.
Fevralın 11-nə rəsmi məzənnə 0,807 AZN/USD təşkil edir.
Məqalə müəllifi ilə əlaqə ünvanı: [email protected]