Türkmənistan, Aşqabad, 12 mart / Trend , müxbir H.Həsənov /
Türkmənistan KİV-nin verdiyi xəbərə görə, Tehranda keçirilən İqtisdi Əməkdaşlıq Təşkilatının (İƏT) sammitində çıxış edən Türkmənistan Prezidenti Qurbanqulu Berdimuhəmmədov bildirib ki, Türkmənistan özünün neytral statusu nəzərə alınmaqla İƏT-də assosiasiya olunmuş üzv şəklində iştirak edəcək.
"Bununla yanaşı, Berdimuhəmmədov Aşqabadın üzərinə götürdüyü öhdəliklərə və birgə layihələrlə bağlı əvvəllər əldə olunmuş mühüm razılaşmalara sadiq qalacağını vurğulayıb", - "Türkmənistan" qəzetində dərc olunmuş məqalədə deyilir.
Türkmənistan əvvəllər də bəyan etmişdi ki, MDB tərkibində də rəsmi Aşqabad assosiasiya olunmuş üzv şəklində fəaliyyət göstərəcək. Ölkənin qəbul etdiyi pozitiv neytrallığa söykənən hərbi doktrinaya əsasən Türkmənistan heç bir hərbi-siyasi bloklara üzv deyil. İqtisadi əməkdaşlığın prioritetləri Tehranda da vurğulanıb.
Türkmənistan region miqyasında, o cümlədən 1992-ci ildən üzvü olduğu İƏT çərçivəsində əməkdaşlığın aktivləşməsinin tərəfdarıdır. Son zamanlar Aşqabad iqtisadi təhlükəsizliyn təminatı, su-enerji problemi və nəqliyyat-kommunikasiya dəhlizləri ilə bağlı bir sıra təkliflər irəli sürüb.
İƏT Tehran, Ankara və İslamabadın təşəbbüsü ilə 1985-ci ildə yaradılıb. 1992-ci ildə isə Türkmənistan, Azərbaycan, Əfqanıstan, Qazaxıstan, Qırğızıstan, Tacikistan və Özbəkistan təşkilata qoşulublar.
Məqalə müəllifi ilə əlaqə ünvanı: [email protected]