Azərbaycan, Bakı, 13 aprel / Trend , müxbir Ü.İsmayılova /
"Mart ayı ərzində Azərbaycanda istehlak qiymətləri indeksi (İQİ) 0,84 faiz azalıb", - İqtisadi Tədqiqatlar Mərkəzi (İTM) QHT-nin bazar ertəsi yaydığı məlumatda deyilir.
Bununla yanaşı, Bakıda deflyasiya 1,05 faiz, regionlarda isə 0,63 faiz təşkil edib.
Təşkilatın hesablamalarına görə, əmtəə qrupları üzrə ən yüksək deflyasiya qeyri-ərzaq məhsullarında - 1,78 faiz - qeydə alınıb. Bu sıradan tikinti materialları (2,67 faiz), geyim və ayaqqabı (1,65) və təsərrüfat malları (1,60 faiz) daha çox ucuzlaşıb.
Ərzaq məhsullarından isə süd və süd məhsulları, yumurta (6,34 faiz) və meyvə-tərəvəz (2,26 faiz) dəyərini ən çox itirən məhsullardandır.
Mart ayında 2008-ci ilin mart ayı ilə müqayisədə İQİ 1,97 faiz artıb. İlin əvvəlindən İQİ 3,16 faiz azalıb. Ötən ilin martında ölkədə 5,34 faizlik inflyasiya qeydə alınmışdı.
Azərbaycan Dövlət Statistika Komitəsinin məlumatına görə, Azərbaycanda martda deflyasiyanın həcmi 0,7 faiz olub.
Məqalə müəllifi ilə əlaqə ünvanı: [email protected]