Azərbaycan, Bakı, 23 aprel / Trend , müxbir Ü.İsmayılova /
"Mart ayı ərzində Bakı şəhəri üzrə təkrar mənzil bazarında bağlanan əqdlərin dinamikasında 3,1% azalma qeydə alınıb. Yeni tikililərin təkrar bazardakı payı ötən ayla müqayisədə 0,9% artaraq 60,3% olub", - "Əmlak Bazarı İştirakçıları" İctimai Birliyinin məlumatında deyilir.
Bazarda təklifin (0,4%) artması qiymət azalmasına bir qədər də təkan verib. Orta qiymət 4,7% azalaraq 1321 $/kv.m-dən 1259 $/kv.m-ə qədər enib.
Ekspertlərin fikrincə, 2009-cu ilin ötən 3 ayı ərzində bazarın bu seqmenti üzrə qeydə alınan passivlik son iki ildə ən yüksək həddə çatıb. Əmlakın bu növü üzrə likvid dəyər azalıb, risk dərəcəsi isə artıb.
Bu səbəbdən təkrar bazar üzrə ekspozisiya müddəti daha 4 gün artaraq 115 günə çatıb.
Bazarda hər otağın orta satış qiyməti 52680 ABŞ dolları (artım 0,7%), mənzilin orta qiyməti isə 124441 (azalma -0,6%) ABŞ dolları təşkil edib.
Ay ərzində Yasamal, Nəsimi, Nərimanov və Xətai rayonlarının təklif portfelindəki payı mütləq çoxluq təşkil edib və bu 4 rayonun ümumi təklif portfelindəki payı birlikdə 78,4%-ə bərabərdir.
Məqalə müəllifi ilə əlaqə ünvanı: [email protected]