Azərbaycan, Bakı, 24 aprel / Trend , müxbir N.İsmayılova /
2009-2014-cü illərdə regionların sosial-iqtisadi inkişafı Dövlət Proqramı çərçivəsində cari ildə kiçik və orta sahibkarlara kredit verilməsi üçün 37 milyon manat vəsait yönəltmək planlaşdırılır. Bu haqda cümə günü İqtisadi İnkişaf Nazirliyi yanında Sahibkarlığa Dəstək Milli Fondunun (SDMF) icraçı direktoru Şirzad Abdullayev Azərbaycanın şimal regionu Xaçmazda keçirilən kredit yarmarkası zamanı deyib.
"2009-cu il dövlət büdcəsində SDMF üçün 74 milyon manat nəzərdə tutulub və vəsaitin yarısı ölkə regionlarında biznesin inkişafına yönəldiləcək", - Abdullayev qeyd edib.
Yarmarkada Xaçmaz, Quba, Qusar və Dəvəçidən olan sahibkarların layihələri ilə tanışlıqda altı Azərbaycan bankı iştirak edib - Azərbaycan Sənaye Bankı, Atabank, Rabitəbank, Kredobank, Turanbank və qeyri-bank kredit təşkilatı Aqrarkredit. Ayrılan kreditin ümumi həcmi hələki açıqlanmır.
Yarmarkada Atabank ümumi həcmi 45 min manat olmaqla kənd təsərrüfatı sahəsi üzrə ixtisaslaşmış üç sahibkara, Rabitəbank 25 min manat məbləğində iki sahibkara, Azərbaycan Sənaye Bankı isə səkkiz subyektə hərəsinə 1000 manat olmaqla kredit ayırıb. SDMF qaydalarına görə, minimal kredit 1000 manat təşkil edir. Kreditlər maksimum beş il müddətinə 7 faiz dərəcəsi ilə ayrılır.
"Kreditlər Azərbaycan regionlarında kiçik və orta sahibkarlığın inkişafına yönəlsə də, xüsusilə kənd təsərrüfatı sahəsini əhatə edəcək. Lakin Quba-Xaçmaz rayonunun sahibkarlıq subyektlərinə gələcəkdə kredit ayrılması üçün treninq və seminarlar keçiriləcək", - Abdullayev deyib.
Aprelin 24-nə olan rəsmi məzənnə 0,8035 AZN/USD təşkil edir.
Məqalə müəllifi ilə əlaqə ünvanı: [email protected]