Gürcüstan, Tbilisi, 13 may / Trend , müxbir N.Kirtsxalia /
Batumi ilə Bakı arasında aviasiya əlaqəsi təşkil olunub. Acarıstan hökumətindən Trend -a verilən məlumata görə, bu məsələ Acarıstan Muxtar Respublikası hökumətinin rəhbəri Levan Varşalomidze ilə Azərbaycanın Milli Aviasiya Şirkəti AZAL-ın baş direktoru arasında keçirilən görüş zamanı müzakirə olunub.
Əldə olunan razılaşmaya görə, uçuşlar iyundan həyata keçiriləcək və təyyarə həftədə üç dəfə Bakı-Tbilisi-Batumi marşrutu ilə hərəkət edəcək.
"Batumi ilə Bakı arasında aviaəlaqənin qurulması üzrə ilk danışıqlar və AZAL rəhbərliyi ilə görüşlər iki ay öncə mənim Bakıya səfərim zamanı baş tutub. Bizim əsas məqsədimiz Azərbaycan turistlərinin Qara dənizin Gürcüstan sahillərinə səfərini təmin etməkdir. Biz düşünürük ki, Acarıstana turizm axınında Azərbaycan seqmenti ciddi şəkildə arta bilər", - deyə Varşalomidze bildirib.
Onun sözlərinə görə, bu aviareys alternativ tranzit yolu kimi də istifadə oluna bilər.
Məqalə müəllifi ilə əlaqə ünvanı - [email protected]
