Azərbaycan, Bakı, 13 may / Trend , müxbir N.İsmayılova /
Azərbaycan-Türkiyə İş adamları Birliyi (ATİB) ölkədə azad rəqabətin inkişaf etdirilməsi məqsədilə Azərbaycan Hökuməti üçün təkliflər hazırlayıb. Bu barədə çərşənbə günü birliyin eksperti Kənan Aslanlı "Azərbaycanda azad rəqabətlə bağlı hazırkı vəziyyət və onun ölkə iqtisadiyyatına təsiri" proqramının təqdimatında deyib.
"Araşdırmaların əsas məqsədi ölkədə azad rəqabətlə bağlı hazırkı vəziyyətin öyrənilməsi, eləcə də azad rəqabətin gələcək inkişafı və mövcud olan qüsurların aradan qaldırılmsı üçün təkliflər hazırlamaqdan ibarət olub", - Aslanlı qeyd edib.
Onun sözlərinə əsasən, hazırda İqtisadi İnkişaf Naziliyinin tabeçiliyində olan Dövlət Antiinhisar Xidmətinin yenidən qurularaq nəzarətedici funksiya daşıyan müstəqil orqan kimi fəaliyyət göstərməsi ATİB-in əsas təklifidir.
"Rəqabət haqqında" məcəllənin layihəsində hazırkı problemlərin çoxunun həlli nəzərdə tutulub. Məcəllənin azad rəqabət sahəsində bütünlükdə mövcud olan çatışmaazlıqları əhatə etməsinə baxmayaraq hesab edirik ki, problemlərin bir hissəsi məcəllənin təsirindən kənarda qalıb", - Aslanlı bildirib.
Onun sözlərinə əsasən, ATİB bu sahədə olan təkliflərini Azərbaycan Hökumətinə və biznes-dairələrinə təqdim edəcək.
Məqalə müəllifi ilə əlaqə ünvanı: [email protected]