Azərbaycan, Bakı, 18 may / Trend , müxbir Ü.İsmayılova /
"Azərbaycanda aprelin 1-nə olan statistikaya əsasən, əmək pensiyası alan şəxslərin sayı cari ilin əvvəli ilə müqayisədə 8612 nəfər artaraq 1.283 750 nəfərə çatıb", - Azərbaycan Əhalinin Dövlət Sosial Müdafiəsi Fondundan bazar ertəsi deyilib.
Onlardan 508 882 nəfəri kişi, 774 868 nəfəri qadınlardır. Qadınlardan 377 834 nəfəri çoxuşaqlı analardır. Bundan başqa, əmək pensiyası alanların arasında dövlət qulluqçusu kimi pensiya alanların sayı 9451 nəfər təşkil edir. Ümumilikdə əmək pensiyaçılarının 128 093-ü işləyən pensiyaçılardır.
Hazırda yaşa görə pensiya alanların sayı 840 885 nəfərdir. Əlilliyə görə əmək pensiyası alan şəxslərin sayı isə 305 031 nəfər təşkil edir. Onlardan 22 286 nəfəri 1-ci qrup, o cümlədən 7613 nəfəri 1-ci qrup gözdən əlillərdir. Əmək zədəsi və peşə xəstəliyi ilə əmək pensiyası alan şəxslərin sayı isə 4605 nəfərdən ibarətdir. Bundan başqa, 36 526 nəfər güzəştli şərtlərlə əmək pensiyası hüququ olan şəxslərdir. Ailə başçısını itirməyə görə əmək pensiyası alan şəxslərin sayı isə 137 834 nəfər təşkil edir. Onlardan 22-i Azərbaycan Milli Qəhrəmanlarının ailə üzvləridir.
Azərbaycanda üç növ əmək təqaüdü vardır: yaşa, əlilliyə və ailə başçısının itirilməsinə görə.
Məqalə müəllifi ilə əlaqə ünvanı: [email protected]
