Azərbaycan, Bakı, 18 may / Trend , müxbir Ü.İsmayılova /
"Kuba Azərbaycan ərzaq məhsullarının idxalında maraqlıdır", - bazar ertəsi Bakıda, Kubanın xarici ticarət və xarici sərmayələr üzrə nazir müavini Rikardo Gerrero deyib.
"Artıq Kuba nümayəndəliyi idxal etmək istəyimiz ərzaq məhsullarının siyahısını hazırlayıb", - Gerrero bildirib.
Onun sözlərinə görə, Kuba və Azərbaycan arasında ticarət dövriyyəsi böyük deyil və simvolik xarakter daşıyır ki, buna da səbəb ölkələr arasında məsafənin uzaqlığı və dəniz nəqliyyatında yüksək tariflərdir.
Ancaq buna baxmayaraq, nazir müavinin sözlərinə görə, Kuba nəinki öz yaxınlığındakı, həm də Avropa və başqa ölkələrlə münasibətlərini fəal şəkildə inkişaf etdirir.
Gerrero deyib ki, ikitərəfli münasibətlərin daha bir prioritet sahəsi turizmdir və Kuba məhz bu sahənin inkişafı məqsədilə ikitərəfli hökumətlərarası müqavilə imzalamaq niyyətindədir.
"Hazırda Kuba neft-qaz sahəsində əməkdaşlıq məsələlərini müzakirə edir. Bu gün əməkdaşlıq hələ danışıqlar mərhələsindədir. Onların bitimindən sonra Kuba hökuməti konkret addımlara keçmək niyyətindədir", - Gerrero bildirib.
Kuba nümayəndə heyətinin Bakıya səfəri çərçivəsində bu gün, Azərbaycanın Mədəniyyət və Turizm Nazirliyi ilə Kuba Mədəniyyət Nazirliyi arasında mədəniyyət sahəsində əməkdaşlıq üzrə müqavilə imzalanıb.
İmzalanma mərasimində Gerrero deyib ki, Kuba və Azərbaycan nümayəndə heyətlərinin iştirakı ilə birgə simpoziumlar və yarmarkaların keçirilməsi nəzərdə tutulur. Həmçinin Kubada və Azərbaycanda qarşılqlı mədəniyyət günlərinin keçirilməsi də nəzərdə tutulub.
Sabah Bakıda iqtisadi əməkdaşlıq üzrə hökumətlərarası komissiyanın ikinci iclası keçiriləcək.
Məqalə müəllifi ilə əlaqə ünvanı: [email protected]