Azərbaycan, Bakı, 17 iyun / Trend , müx. U.İsmayılova /
Hazırda Azərbaycanda "donuz qripi"nin (А(H1N1)) mövcudluğu barədə heç bir fakt aşkarlanmayıb, çərşənbə günü ölkənin baş sanitar həkimi, səhiyyə nazirinin müavini Abbas Vəlibəyov bildirib.
"Donuz qripi" faktının aşkar edilməməsinə baxmayaraq, Azərbaycanda bu xəstəliyin profilaktikası və diaqnostikası yüksək səviyyədə aparılır", - nazir müavini bildirib.
Onun sözlərinə görə, xəstəlik aşkar olunduğu halda, azərbaycanlı həkimlər "donuz qripi"nin müalicəsini ən yüksək səviyyədə aparacaqlar.
Ümumdünya Səhiyyə Təşkilatı (ÜST) yeni virusla А(Н1N1) yoluxma təhlükəsini maksimal səviyyəyə -altıncı səviyyə yüksəltmək barədə qərar qəbul edib. Bununla bərabər, təşkilatın mütəxəssisləri yeni qrip virusunun pandemiyasının başlanması barədə bəyanat veriblər (ilk dəfə olaraq 1968-ci ildəki "honkonq qripi" dövründən). ÜST-nin məlumatlarına görə, ABŞ xəstələrin sayına görə dünyada birincidir. Hazırda orada 13 mindən artıq fakt qeydə alınıb və onlardan 27-si ölümlə nəticələnib.
Bir müddət əvvəl ABŞ-ın səhiyyə və sosial xidmət naziri Ketlin Sibelius bəyan edib ki, payıza qədər Amerika mütəxəssisləri "donuz qripi"-nə qarşı vaksin yaradacaqlar. Hazırda "yayın sonlarında vaksinin hazırlanmasına başlamaq və payızın əvvəlinə (onun tətbiq edilməsinə) hazır olmaq üçün artıq istehsal xətləri quraşdırılır", nazir bildirib.
Məqalə müəllifi ilə əlaqə ünvanı:[email protected]