Azərbaycan, Bakı, 20 iyul / Trend , müxbir N.İsmayılova /
"Bank Melli Iran-ın Bakı filialı avtomobil alınması üçün kreditlərin verilməsinə başlayıb", - bazar ertəsi bankın filialının direktor müavini Anar İbrahimov deyib.
"Avtomobil alışı üçün kreditlər yalnız bankın tərəfdaşı olan avtosalonlarda verilir", - İbrahimov bildirib.
Onun sözlərinə görə, hazırda bank yalnız bir özəl - rus avtomobillərini satmaqda ixtisaslaşan avtosalonla əlaqə qurub. Gələcəkdə tərəfdaşların siyahısı genişlənə bilər.
Avtomobil alışı üçün kreditləri bank ilkin ödəmə 30 faiz, illik 26 faiz və iki il müddətinə şərtlərilə verir. Kreditin maksimal məbləği 10 min dollardır.
Bank istehlak kreditlərini maksimum 10 min dollar, korporativ kreditləri 50 min dollar məbləğində verir və qoyulan maksimumdan artıq məbləğdə kreditin alınması üçün müraciətləri nəzərdən keçirir. Bank kreditləri illik 23 faiz dərəcəsi ilə verir.
Mayın 1-nə Bank Melli Iran-ın Bakı filialının kredit portfeli 6,26 milyon manat, depozit portfeli - 2,39 milyon manat təşkil edib. Bankın aktivləri 18,95 milyon manat, nizamnamə kapitalı 10,1 milyon manat, məcmu kapitalı 11,481 milyon manatdır. Bu ilin ilk beş ayı ərzində bankın gəliri 163,97 min manat təşkil edib.
İyulun 20-nə olan rəsmi məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]