Azərbaycan, Bakı, 21 iyul / Trend , müxbir N.İsmayılova /
Azərbaycan İqtisadi İnkişaf Nazirliyi yanında Sahibkarlığa Yardım Milli Fondu (SYMF) kiçik və orta sahibkarlığın maliyyələşdırilməsi üzrə kredit alınması üçün Dünya Bankına (DB) rəsmi müraciət ünvanlamayıb. Bu barədə DB-nin Bakı nümayəndəliyinin rəhbəri Qreqori Yedjeyçak deyib.
"SYMF-in kredit xətti almaq şansları böyükdür. Lakin dəqiq məbləğ hələ razılaşdırlır. Məbləğ planlaşdırılan 100 milyon dollardan çox da ola bilər, az da. Fondla fəal surətdə danışıqlar aparılır, lakin banka rəsmi müraciət hələ daxil olmayıb", - Yedjeyçak deyib.
Fondun icraçı direktoru Şirzad Abullayev bir müddət əvvəl bildirib ki, beynəlxalq auditor "Baker Tilly Audit Azerbaijan" tərəfindən fondun 2008-ci il üçün maliyyə hesabatının qiymətləndirilməsi başa çatdırılıb. Fond audit hesabını tezliklə DB missiyasının müzakirəsinə təqdim edəcək.
İllik 2-3 faizlə DB-dən və ya digər maliyyə institutlarından kredit ehtiyatı alınacağı təqdirdə müəssisələrin maliyyələşdirilməsi zamanı kredit dərəcəsinə bank marjı və SYMF tərəfindən bir faizi əlavə oluna bilər.
2009-cu ildə fondun xətti ilə 130 milyon manat güzəştli kreditin verilməsi planlaşdırılır. Bunun 74 milyon manatı büdcə vəsaitinin, 56 milyon manat isə əvvəl verilmiş kredit ehtiyatlarının hesabına formalaşdırılır.
İyulun 21-nə olan rəsmi məzənnə 0,8041 AZN/USD təşkil edir.
Məqalə müəllifi ilə əlaqə ünvanı: [email protected]