Azərbaycan, Bakı, 01 avqust / Trend , müxbir N.İsmayılova /
Mərkəzi Bank yanında fəaliyyət göstərən Azərbaycan İpoteka Fondunun (AİF) aktivləri keçən il ərzində 47,3 faiz artaraq 2009-cu il yanvarın 1-nə 68,89 milyon manat təşkil edib. Bu barədə fondun ötənilki maliyyə-təsərrüfat fəaliyyəti üzrə hesabatında deyilir.
AİF-in 2008-ci ildəki fəaliyyəti barədə maliyyə hesabatına dair audit xülasəsi "Baker Tilly Azerbaijan" audit şirkəti tərəfindən hazırlanıb.
Fondun balans hesabatına əsasən, hesabat dövrü ərzində fondun kredit portfeli 30,5 faiz artaraq 59,5 milyon manat təşkil edir. Ötən il ərzində fondun xalis gəliri 143,6 min manat, bölünməmiş gəliri isə 798,4 min manat təşkil edib. Hesabat dövrü ərzində fondun mədaxili 1,314 milyon manat təşkil edib. Onun böyük hissəsi - 1,298 milyon manat faiz gəlirləridir. Fondun öhdəçiliyi ilin əvvəlinə 88,5 min manat təşkil edib.
2009-cu ildə ipoteka kreditlərinin yenidən verilməsinə qədər fondun kredit səlahiyyətli təşkilatı 23 bank idi. Dövlət büdcsində 2008-ci ilə fondun maliyyələşməsi üçün 34 milyon manat ayrılmışdı. Bundan 22 milyon manat bankların yenidən maliyyələşməsi üçün ayrılıb.
Azərbaycanın dövlət büdcəsində 2005-2009-cu illərdə AİF vasitəsilə ipotekanın maliyyələşməsinə 94 milyon manat nəzərdə tutulub. Vəsaitdən 75,8 milyon manat banklar vasitəsilə ayrılıb. Bundan savayı, fond bazara hər birinin nominal dəyəri 1000 manat olan 55 min manat istiqraz buraxıb. Emissiyanın ümumi həcmi 55 milyon manatdır. Onlardan artıq 25 milyon manatlıq istiqraz realizə edilib. Bu emissiyaların tam yerləşdirilməsi təxminən 1100 ipoteka kreditinin verilməsinə imkan yaradacaq.
Avqustun 01-nə olan rəsmi məzənnə 0,8043 AZN/USD təşkil edir.
Məqalə müəllifi ilə əlaqə ünvanı: [email protected]