Azərbaycan, Bakı, 14 avqust / Trend /
2009-cu ilin ikinci rübü ərzində "Transparency International" şirkətinin Azərbaycanda həyata keçirdiyi "İctimai maraqların mühafizəsi və hüquqi yardım mərkəzləri" layihəsi çərçivəsində layihənin realizəsi mərkəzlərinə 1402 zəng və şikayət daxil olub. Bu barədə cümə günü USAID-dən yayılan məlumatda deyilir.
Ölkədə yerləşən beş mərkəzdən Bakı ofisinə 138, Gəncə ofisinə 381, Lənkəran ofisinə 222, Quba ofisinə 350, Şəki ofisinə isə 311 zəng və şikayət daxil olub.
Layihənin məlumatına görə, daxil olan şikayətlərdən 19 faizi (271 şikayət) məhkəmə sisteminə, 11 faizi (148) pensiya ödəmələrinə, beş faizi (74) icra hakimiyyətinə, 12 faizi (173) polisə aiddir.
Layihənin realizəsinin bütün dövrü ərzində 19 907 şikayət daxil olub. Onlardan 16 faizi (3268 şikayət) məhkəmə sisteminə, 8 faizi (1515) pensiya ödəmələrinə, 6 faizi (1104) icra hakimiyyətinə, 9 faizi (1796) polisə aiddir.
"İctimai maraqların mühafizəsi və hüquqi yardım mərkəzləri" layihəsi Azərbaycanda 2005-ci ilin aprelindən ABŞ-ın İnkişaf Agentliyi (USAID) və ATƏT-in Bakı ofisinin maliyyə dəstəyi ilə həyata keçirilir.
