Azərbaycan, Bakı, 14 avqust / Trend , müxbir İ.Хəlilova /
"Azərbaycanda ipoteka kreditləşməsinin bərpa edildiyi vaxtdan - 2009-cu il 1 iyun tarixindən etibarən təxminən 600 nəfər, Mərkəzi Bankın nəzdində fəaliyyət göstərən Azərbaycan İpoteka Fondu (AİF) xətti ilə 25 milyon manat həcmində ipoteka krediti alıb", - cümə günü fonddan deyilib.
"2006-cı ilin martından başlayaraq AİF xətti ilə maliyyələşdirmənin ümumi həcmi 100 milyon manatı ötüb. Bunun nəticəsində təxminən 2600 ailə mənzil problemini həll edə və sosial tələbatlarını ödəyə biliblər", - İpoteka Fondundan bildirilib.
"Azərbaycanda ipoteka kreditləşməsi gələcəkdə də sabit və davamlı xarakter daşıyacaq", - AİF-dən qeyd edilib.
Sadəcə bu ilin iyul ayı ərzində 16 milyon manatdan çox ipoteka krediti verilib. 2006-cı ildə isə bu rəqəm 5,6 milyon manat olub.
AİF standartları ilə verilən bütün kreditlər uzunmüddətli dövrə və aşağı faiz dərəcələrinə hesablanıb. Kreditlər üzrə orta müddət 24 il, orta faiz dərəcəsi ildə 7,6 faiz təşkil edib.
2006-2007-ci illərdə AİF xətti ilə 75,8 manatlıq ipoteka krediti verilib ki, bu da təxminən iki min ailənin mənzil təminatı problemlərini həll etmək imkanı verib.
İpoteka kreditləşməsi AİF tərəfindən cəlb edilən vəsaitlər hesabına həyata keçirilir. Fond ildə üç faiz dərəcəsi ilə, yeddi il müddətinə 55 milyon manat həcmində təminatlı istiqraz emissiya edib. Ümumi emissiya həcmindən 25 milyon manatı artıq yerləşdirilib.
Adi ipotekanın qiyməti əvvəllər olduğu kimi 50 min manat, güzəştlinin qiyməti 35 min manat təşkil edir. Adi kredit üçün maksimal faiz dərəcəsi səkkiz, güzəştli üçün dörd faiz təşkil edir. Adi kreditin maksimum verilmə müddəti 25, güzəştlisi 30 ildir. İlkin ödəmənin həcmi isə bütün kateqoriyalar üçün 15 faiz təşkil edir.
Fondun səlahiyyətli kredit təşkilatı 17 bankdır. 2009-cu ildə sosial ipotekanın maliyyələşdirilməsi üçün dövlət büdcəsində 14,5 mln. manat nəzərdə tutulub.
Avqustun 14-nə olan rəsmi məzənnə 0,804 AZN/USD təşkil edir.
Məqalə müəllifi ilə əlaqə ünvanı: [email protected]
