Azərbaycan, Bakı, 17 avqust / Trend , müxbir Ü.İsmayılova /
İkinci rübdə Azərbaycanda inşaat işlərinin qiymət indeksi 2009-cu ilin birinci rübünə nisbətən 0,2 faiz, ötən ilin müvafiq dövrünə nisbətən isə 3,1 faiz azalıb. Bu barədə bazar ertəsi Dövlət Statistika Komitəsindən məlumat verilib.
Yaşayış binalarının qiymət indeksi də bu dövrə 2 faiz azalıb (2008-ci ilin müvafiq dövrünə nisbətən 2,3 faiz). O cümlədən il ərzində beşmərtəbəli yaşayış binalarının qiymət indeksi 3 faiz (2,1 faiz), altı və daha hündür mərtəbəli binaların qiyməti isə 2 faiz (2,3 faiz) azalıb.
Sosial əhəmiyyətli binaların inşası üzrə işlərin qiymət indeksi 2 faiz (2,3 faiz) azalıb. O cümlədən administrativ binaların 3 faiz (2,1 faiz), ümumtəhsil məkətblərinin qiymət indeksi isə 3 faiz (2,6 faiz) azalıb.
Yolların salınması üzrə işlərin qiymət indeksi 1 faiz aşağı düşüb, ötən ilin müvafiq dövrünə nisbətən isə 0,1 faiz artıb.
İnşaat işlərinə hazırlıq üzrə qiymətlərin indeksi birinci rüblə müqayisədə 2 faiz, binaların tikintisi, xüsusi avadanlıqlar və onların hissələri, mülki inşaat işləri üzrə 3 faiz, bina və təchizatın qurulması üzrə 1 faiz, inşaat işlərinin başa çatdırılması üzrə qiymətlərin indeksi isə 2 faiz azalıb.
Məqalə müəllifi ilə əlaqə ünvanı: [email protected]
