Gürcüstan, Tbilisi, 19 avqust / Trend , müxbir N.Kirsxaliya /
"Gürcüstan Milli Bankının Monetar siyasət komitəsi avqustun 19-da monetar siyasət dərəcəsini dəyişməz olaraq - 6 faiz səviyyəsində saxlamaq qərarını verib", - Milli Bankdan deyilib.
İyul ayında illik inflyasiya göstəricisi 0,1 faiz, orta illik inflyasiya isə 4,6 faiz təşkil edib. Komitənin son iclasından sonra inflyasiyanın proqnoz göstəriciləri azalmağa doğru dəyişib və gözlənilir ki, avqustda illik inflyasiya mənfi olacaq və ilin sonuna qədər artaraq 3-4 faiz ətrafında qərarlaşacaq.
Son üç ay ərzində bank sektorunda sabit olaraq həm hüquqi, həm də fiziki şəxslərin depozitlərinin həcmi artıb. Buna baxmayaraq, kredit fəallığı hələ də aşağı olaraq qalır.
Bunun nəticəsində Milli Bankda kommersiya banklarının müxbir hesablarında qalıqlar yetərincə çoxalıb. Artan likvidliyin kreditlərə faiz dərəcələrinin azalmasına təsir göstərəcəyi gözlənilir.
Avqustun 5-dən etibarən Maliyyə Nazirliyi xəzinə öhdəliklərinin emissiyasını bərpa edib və bugünkü satış da daxil olmaqla, üç hərrac baş tutub. Bütün hallarda yüksək tələb qeydə alınıb və emissiya tam şəkildə yerləşdirilib. Faiz dərəcələri nisbətən aşağı olub.
Monetar siyasət komitəsinin növbəti iclası sentyabrın 16-da baş tutacaq.
Məqalə müəllifi ilə əlaqə ünvanı: [email protected]
