Azərbaycan, Bakı, 20 avqust / Trend , müxbir İ.Xəlilova /
Avropa Yenidənqurma və İnkişaf Bankı (AYİB) 2010-cu ilin əvvəlində (yanvarda da ehtimal var) Azərbaycanda sonrakı iki ili əhatə edəcək fəaliyyətin yeni strategiyasının hazırlanmasına başlayır. Bu barədə cümə axşamı AYİB-in Bakı nümayəndəliyindən deyilib.
"Yeni strategiya çərçivəsində əməkdaşlığın istiqamətlərini müzakirə etmək üçün ilin əvvəlində Bakıya Avropa bankınının Direktorlar Şurasınının üzvlərinin səfəri gözlənilir", - nümayəndəlikdən deyilib.
Bu gün AYİB Azərbaycanın bank sektorunun inkişafında lider mövqeyini qorumaqdadır. Bank sonrakı illərdə maliyyələşdirmə üçün ölkənin qeyri-neft sektorunu, o cümlədən aqrobiznes sahəsini daha prioritet istiqamət hesab edir. Bank həmçinin nəqliyyat, energetika, infrastruktur layihələrinin maliyələşməsində iştirakını genişləndirir. AYİB artıq özəl sektora və özəl sahibkarlığın gələcək inkişafına dəstək, kiçik və orta sahibkarlığın maliyyələşməsi istiqamətində birbaşa və dolayısı yolla işləyir.
Proqnoza əsasən, 2009-cu ilin sonuna Azərbaycan üçün nəzərdə tutulan ümumi investisiyanın həcmi bir milyard dolları ötəcək. 2008-ci ildə bank Azərbaycanda 19 müxtəlif layihəyə 120 milyon dollar maliyyə yatırıb. 2009-cu ildə isə bu vəsait 14-15 müxtəlif layihəyə 220 milyon dollar təşkil edəcək.
2010-cu ildə bank 2009-cu ildəkindən çox investisiya qoymağı planlaşdırır. Xüsusilə də bank Azərbaycan iqtisadiyyatının bank və real sektoruna, kiçik və orta sahibkarlığa, elektrik enerjisi sektoruna dəstək üçün investisiyanı ikiqat artırmaq niyyətindədir. Bunu 5 ildən 15 ilədək müddətdə uzunmüddətli maliyyələşmə hesabına etmək qərara alınıb.
AYİB Azərbaycanda ümumilikdə 1,2 milyard dollarlıq 90 layihə həyata keçirib.
AYİB-in vəsaiti Mərkəzi Avropadan Mərkəzi Asiyaya qədər 30 ölkədə bazar iqtisadiyyatının və demokratiyanın təşəkkülü məqsədi ilə istifadə olunur. Bankın sahibləri 61 ölkə və iki beynəlxalq təşkilatdır.
Məqalə müəllifi ilə əlaqə ünvanı: [email protected]
