Azərbaycan, Bakı, 01 sentyabr / Trend , müxbir Ü.İsmayılova /
Azərbaycan Prezidenti İlham Əliyev Mənzil Məcəlləsinin tətbiq edilməsi, eləcə də bununla əlaqədar hüquqi tənzimləmə məsələləri barədə fərman imzalayıb. Bu barədə AzərTAc Dövlət İnformasiya agentliyi məlumat yayıb.
Fərmana əsasən, Azərbaycan Nazirlər Kabinetinə iki ay ərzində qüvvədə olan qanunvericilik aktlarının bu qanuna uyğunlaşdırılması barədə təkliflərini hazırlayıb Azərbaycan Prezidentinə təqdim etmək tapşırılıb.
Nazirlər Kabinetinə üç ay ərzində dövlət mənzil fondunun xidməti yaşayış sahələri verilən vətəndaşların kateqoriyaları, yaşayış sahəsinin keçirilməsi və ya ondan imtina haqqında qərarın forma və məzmununun müəyyən edilməsi, tutulmuş yaşayış sahəsinin yenidən qurulması və (və ya) yenidən planlaşdırılması barədə ərizəyə baxılmasının nəticələrini təsdiqləyən sənədin forma və məzmununun müəyyən edilməsi barədə təkliflərini hazırlamaq tapşırılıb.
Dövlət başçısı həmçinin sosial kirayə müqaviləsi əsasında dövlət mənzil fondunun yaşayış sahəsinin ayrılma norması, dövlət mənzil fondunun yaşayış sahələri ilə təmin edilmə məqsədləri üçün yaşayış sahəsinin uçot norması barədə məlumatlandırılmalıdır. Bundan əlavə, vətəndaşların yaşayış sahəsinə ehtiyacı olan qismində uçotunun aparılması qaydası, yaşayış sahəsinin xüsusi təyinatlı mənzil fonduna aid edilməsi qaydası, xidməti yaşayış sahələrinin verilməsi qaydası və halları Azərbaycan Prezidenti ilə razılaşdırılmaqla müyyən edilməlidir. Nazirlər Kabinetinin tapşırığına həmçinin dövlət mülkiyyətində olan sosial xidmət sisteminin yaşayış sahələrində (binalarında) vətəndaşların, yerlərdə qaçqın və müvəqqəti köçkünlərin, o cümlədən yataqxanalarda yaşayan sakinlərin yaşama haqlarının miqdarının müəyyənləşdirilməsi daxildir.
Ölkə Prezidenti ilə razılaşdırılmaqla çoxmənzilli binanın idarəedici təşkilatının seçilməsi üzrə açıq müsabiqə keçirilməsi qaydası müəyyənləşdiriləcək. Dövlət və bələdiyyə mənzil fondunun inkişafı istiqamətində də təkliflər hazırlanmalıdır.
Fərman imzalandığı gündən - 27 avqustdan qüvvəyə minib.
Məcəllənin qəbul edilməsinin zəruriliyi ondan ibarətdir ki, son illər ərzində ölkənin mənzil fondu beş dəfə artıb. Mənzil münasibətləri və mülkiyyət forması müxtəlif olub. Hazırda dövlət, özəl, kooperativ, bələdiyyə mülkiyyəti var.
Məcəllə ölkənin mənzil fonduna, əmlak sığortasına, dövlət nəzarəti qaydalarına, yaşayış sahələrinin qeyri-yaşayış sahələrinə və ya əksinə sənədləşdirilməsi, eləcə də ondan imtina qaydasını nəzərdə tutur. Məcəllə həmçinin əmlak mülkiyyətçilərinin, mülkiyyətçilərin yaşayış sahələrində yaşayan digər şəxslərin hüquq və vəzifələrini, ümumi əmlaka ayrıca hüquqların müəyyənləşdirilmə qaydalarını, çoxmənzilli binalarda mülkiyyət qaydalarında sərhəd və payları müəyyən edir.
Məcəlləyə əsasən, təbii fəlakət nəticəsində ziyan çəkən mənzillərin təmiri üçün dövlət kompensasiya ödəyəcək. Məcəllədə qəza vəziyyətində olan mənzilin sahibinin onu yenidən təmir etməyə imkanı olmasa mənzilin hərrac yolu ilə satışa çıxarılacağı da göstərilib. Dövlət ehtiyacına lazım olan ərazidə yerləşən mənzillər bazar qiymətləri ilə qiymətləndiriləcəklər, ehtiyac yarandıqda isə mənzil sakinləri yeni mənzilə köçürülənə qədər müvəqqəti mənzillə təmin ediləcəklər.
Mənzil Məcəlləsində həmçinin mənzil-tikinti kooperativlərinin fəaliyyəti, kooperativ üzvlərinin hüquqları, mənzil-tikinti kooperativlərində yaşayış sahələrinin bölünməsi, onların icarəyə verilməsi qaydaları barədə də danışılır.
"Mənzil Məcəlləsi" 145 maddədən ibarətdir. Məcəllə mənzil hüquqlarının əsaslarını, mənzil münasibətlərində dövlətin vəzifələrini, bələdiyyələrin hüquqlarını, yaşayış sahələrinin növlərini, yaşayış sahələrindən istifadə qaydalarını təsdiq edir.
Məqalə müəllifi ilə əlaqə ünvanı: [email protected]
