Azərbaycan, Bakı, 11 sentyabr / Trend , müxbir N.İsmayılova /
Azərbaycan bankı Kapital Bank-da bank qarşısında duran iri strateji vəzifələrin yerinə yetirilməsi məqsədilə təşkilati struktur yeniləşdirilib. Bu barədə cümə günü bankdan verilən məlumatda deyilir.
24 iyul 2009-cu ildə iclası keçirilən Müşahidə Şurasının qərarına əsasən, cari il sentyabrının 1-dən yeni təşkilati struktur qüvvəyə minib və bankda iki yeni departament yaradılıb.
"Beynəlxalq standartların tələblərinə cavab vermək, risklərin idarə edilməsi prosesini təkmilləşdirmək və kredit portfeli üzərində nəzarəti daha da gücləndirmək məqsədilə bankda Risklərin idarə edilməsi və Problemli kreditlərlə iş departamentləri yaradılıb", - bankın məlumatında deyilib.
Press-relizdə deyildiyi kimi, kredit siyasətində sağlam konservatizm tərəfdarı olaraq, bankda əsas diqqət kredit portfelinin keyfiyyəti və diversifikasiyasına yönəldilir. Bankda girov təminatının keyfiyyəti müntəzəm şəkildə monitorinqdən keçir.
Bir sıra departamentlərin adlarında dəyişikliklər edilib. Belə ki, keçmiş Mərkəzi Katiblik - İnsan resurslarının idarə edilməsi departamenti, Strateji inkişaf və marketinq departamenti - Strateji planlaşdırma və marketinq departamenti, Plastik kartlar və riteyl departamenti - Riteyl departamenti, İnzibati işlər departamenti isə İnzibati idarəetmə departamenti adlanacaq.
"Edilən dəyişikliklərə texniki məsələ kimi baxmaq düzgün olmazdı, çünki yeni struktur ilk növbədə Bankın effektiv iş qurmaq imkanlarını genişləndirir və fəaliyyət profili baxımından departamentləri daha düzgün istiqamətləndirir", - məlumatda deyilib.
2009-cu ilin birinci yarısının yekunlarına görə, bankın aktivləri 356,7 milyon manat, öhdəçiliyi isə 270,6 milyon manat olub. Əhalinin uzunmüddətli əmanətlərinin məbləği 82,5 milyon manat təşkil edib. Bankın işlək plastik kartlarının sayı 1,83 milyon ədəddir.
Bankın səhmdarlarının stukturu hazırda bu şəkildə formalaşdırılır: Pasha Holdinq-ə səhmələrin 97,5 faizi məxsusdur , bankın 2400 əməkdaşı 2,5 faiz səhmə sahidbir.
Hazırda respublikanın bütün regionları üzrə bankın 87 filialı, iki müstəqil şöbəsi və filialların tabeliyində 97 şöbəsi (kassa), eləcə də 12 valyutadəyişmə məntəqəsi var.
Sentyabrın 11-nə olan rəsmi məzənnə 0,8033 AZN/USD təşkil edir.
