Azərbaycan, Bakı, 19 sentyabr / Trend , müxbir İ.Xəlilova /
Bakıda sentyabrın 25-də Azərbaycan-Aİ əməkdaşlıq komitəsinin onuncu iclasının keçirilməsi planlaşdırılır. Bu barədə şənbə günü xarici işlər nazirinin müavini Mahmud Məmmədquliyev deyib.
Onun sözlərinə görə, iclasın gündəliyinə siyasi və iqtisadi infrastruktur xarakterli məsələlər və 2006-cı ilin noyabrında Brüsseldə energetika, ticarət və insan haqları üzrə imzalanan Avropa Qonşuluq Siyasəti (AQS) çərçivəsində fəaliyyət planının reallaşdırılması daxildir.
Hazırda Azərbaycanın Aİ ilə əməkdaşlığı AQS çərçivəsində həyata keçirilir ki, bunda da 2007-2010-cu illərdə ölkə üçün 92 milyon avro həcmində vəsait nəzərdə tutulub.
AQS fəaliyyət planının Azərbaycan üçün prioritet istiqaməti ölkədə demokratiyanın gücləndirilməsi, biznes və investisiya mühitinin yaxşılaşdırılması, iqtisadi inkişafa dəstək, Aİ və Azərbaycan arasında energetika və nəqliyyat sahəsində əməkdaşlıq, regional əməkdaşlıq və s. təşkil edir.
Tədbir üç əsas prioritet sahəyə - idarə sisteminin təkmilləşdirilməsi, iqtisadi və sosial islahatlar, energetika, nəqliyyat, ekologiya və infrastruktur sahələrinə ayrılıb.
