Azərbaycan, Bakı, 05 oktyabr / Trend , müxbir Ü.İsmayılova/
Almaniyanın Kənd Təsərrüfatı və İstehlakçıların Hüquqlarının Müdafiəsi Nazirliyinin şöbə müdiri Ditrix Qutx Almaniya-Azərbaycan aqrar biznes-forumunda deyib ki, dünyanın bir çox ölkələrində yayılan "donuz qripi" Azərbaycanla Almaniya arasında olan aqrar mal dövriyyəsinə təsir etməyib.
O həmçinin qeyd edib ki, Azərbaycan aqrar məhsullarının Avropa bazarlarına çıxarılması çərçivəsində, Almaniya Azərbaycan mütəxəssisləri ilə birgə yolxucu xəstəlikləri olan heyvanların ölkəyə gətirilməsinin və ya ölkədən aparılmasının qarşısını almaq niyyətindədir.
"Biz Azərbaycanda heyvanlar arasında infeksion xəstəliklərin profilaktikasında Avropa standartlarını tətbiq tətbiq etmək və həmçinin, yolxucu xəstəliklərin Azərbaycan ərazisindən Avropaya keçməsinin qarşısını almaq məqsədilə ölkənin sərhədlərində birgə işlər aparmaq niyyətindəyik", - Qutx deyib.
O deyib ki, Azərbaycanla Almaniya arasında aqrar mal dövriyyəsi 2001-ci ildən 2008-ci ilədək 10.3 milyon avrodan 89 milyon avroya çatıb. Azərbaycandan Almaniyaya əsasən meyvə, tərəvəz və ikra ixrac olunur. Almaniyadan Azərbaycana isə süd və süd məhsulları, ət və ət məhsulları ixrac olunur.
Bu gün Bakıda Almaniya-Azərbaycan aqrar biznes-forumu keçirilir. Forumda Azərbaycan tərəfindən 100-dək, Almaniyadan isə kənd təsərrüfatının müxtəlif sahələrində işləyən 22 sahibkar iştirak edir.
