Azərbaycan, Bakı, 06 oktyabr / Trend , müxbir İ.Xəlilova/
Unibank və AtaBank kifayət dərəcədə böyük banklardır və onların maliyyə vəziyyəti də çox yaxşıdır. Lakin əgər onlar birləşməyə qərar versələr, bu onların hər ikisi üçün daha yaxşı olacaq. Bu barədə Azərbaycan Mərkəzi Bankının İdarə Heyəti sədrinin birinci müavini Alim Quliyev deyib.
"Mən Unibank və Atabank-ın bu planları barədə heç nə eşitməmişəm, lakin ayrı-ayrılıqda onların hər ikisi yaxşı banklardır", - sədr müavini belə deyib.
Onun sözlərinə görə, baxmayaraq ki, böhran dövründə Unibanka ilk yardım məhz Mərkəzi Bank tərəfindən göstərilib, lakin bu xarici borc üzrə vəzifələrin yerinə yetirilməsinə dəstək üçün zəruri olub.
"Bu bank sistem yaradan bankdır, bunun üçün də onun bazarda saxlanmasını dəstəkləmək lazımdır, - Quliyev deyib. - Digər tərəfdən ölkənin imicini nəzərə alaraq, biz beynəlxalq təşkilatlar və xarici banklardan alınan xarici borcları vaxtında ödəmək üçün bankları dəstəkləməyə hazırıq".
Bu banklardan deyilib ki, həmin məsələ bu gün müzakirə mövzusu deyil.
Əsas maliyyə göstəricilərinə görə, Unibank Azərbaycanda fəaliyyət göstərən 10 aparıcı bankdan biridir. 2009-cu il iyunun 1-də bankın aktivləri və kredit portfeli müvafiq olaraq 456 milyon dollar və 332 milyon dollardan artıq olub. Həmin tarixə nəzərən, onun müştərək kapitalı beynəlxalq maliyyə hesabatı standartlarına görə 61 milyon dollara bərabər olub.
Unibank artıq birləşmə sahəsində təcrübəyə malikdir. Belə ki, o iki ticarət bankının - Mbank və PromTexBank banklarının birləşməsi nəticəsində yaranıb.
Atabank-ın yeganə təsisçisi AtaHolding-dir.
Məqalə müəllifi ilə əlaqə ünvanı: [email protected]