Azərbaycan, Bakı, 14 oktyabr / Trend , müxbir Ü.İsmayılova/
Azərbaycan Türkiyə İş Adamları Birliyi (ATİB) "Təhsil sektorunun inkişafı perspektivləri və qarşılıqlı biznes əlaqələri" adlı hesabat hazırlayıb, çərşənbə günü ATİB-dən məlumat verilib
Hesabat Azərbaycanda fəaliyyət göstərən biznesmenlərin iqtisadi və sosial sahələrdə informasiya təminatının yaxşılaşdırılması məqsədi ilə hazırlanıb.
Azərbaycanda təhsil sisteminin vəziyyətini ətraflı qiymətləndirmək, onun çatışmazlıqlarına diqqət yetrimək, sistemin təkmilləşdirilməsi üçün tövsiyələrin vermək, həmçinin biznes əməkdaşlığı layihənin əsas məqsədlərini təşkil edir.
Layihənin reallaşdırılması ərəfəsində təhsil sisteminin inkişafı istiqamətində tədqiqatlar aparılıb və təşkilat nümayəndələri və mütəxəssisləri, təhsil müəssisələri və idarə orqanlarının başçıları, təcrübəli professor-müəllim heyətləri, həmçinin ictimai təşkilatların nümayəndələri və özəl sahibkarlıqla məşğul olan şəxslərlə görüşlər keçirilib.
Hesabatın ilk fəsli Azərbaycanın təhsil sisteminin vəziyyətinin analizi haqqındadır. İkinci fəsildə isə təhsildə sahibkarlıq fəaliyyətinin yeri və rolu analiz edilir. Üçüncü fəsildə Azərbaycanda təhsilin modernləşdirilməsi üzrə islahatlar tədqiq edilir. Burada yeni ixtisaslar (sosialogiya, psixologiya, menecment, dövlət idərələri və s.), milli elmi məktəblərin yaradılması və digər analoji aktual məsələlər göstərilib.
Dördüncü fəsildə isə ölkə iqtisadiyyatının müxtəlif sahələrinin milli peşəkar kadrlarla təmin edilməsi məsələsi analiz edilir və qiymətləndirilir. Dövlət və qeyri-dövlət təhsil sisteminin fəaliyyət təcrübələri və inkişaf perspektivləri istiqamətində məsləhətlər beşinci fəsildə göstərilib.
Məqalə müəllifi ilə əlaqə ünvanı: [email protected]