Azərbaycan, Bakı, 19 oktyabr / Trend , müxbir İ.Xəlilova/
2009-cu ilin yanvar-sentyabr aylarında Azərbaycanın iqtisadi və sosial sahələrinin inkişafı üçün 5199,4 milyon manat sərmayə yatırılıb. Bu, keçən ilin analoji dövrü ilə müqayisədə 17,2 faiz azdır. Dövlət Statistika Komitəsindən bazar ertəsi verilən məlumata görə, şəxsi əmlakda yerləşən müəssisə və təşkilatlar əsas kapitala 2094,5 milyon manat (bütün sərmayələrin 40,3 faizi), dövlət əmlakına isə 3104,9 milyon manat (59,7 faiz) sərmayə qoyub.
Təmir-tikinti işlərinə ümumi sərmayə həcminin 71,6 faizi, yəni 3721,2 milyon manat yönəldilib. İstehsalat müəssisələrinin tikintisinə 3952,4 milyon manat (76 faiz), qeyri-istehsalat müəssisələrinin tikintisinə isə 1247 miyon manat (24 faiz) sərmayə cəlb olunub.
Xarici investisiyaların həcmi 17,6 faiz, yəni 914,216 miyon manat təşkil edib. İnvestisiyaların ümumi həcminin 82,4 faizi (4.285 milyon manat) daxili investisiyaların payına düşür. Daxili investisiyaların çox hissəsi dövlət idarə və təşkilatlarına yatırılıb.
Əsas kapitala qoyulan vəsaitlərin 25,9 faizi (1347,2 milyon manat) ölkənin neft sektorunun, 74,1 faizi (3852,2 milyon manat) qeyri-neft sektorunun inkişafına yönəldilib. Qeyri-neft sektoruna investisiya qoyuluşu ötən ilin analoji dövrü ilə müqayisədə 8,2 faiz azalıb.
Bununla belə, investisiyanın 39,1 faizi sənayenin inkişafına, 3,7 faizi kənd təsərrüfatının, 0,2 faizi balıqçılığın, 4,1 faizi ticarət və xidmət sahəsinə, 26.3 faizi nəqliyyat, 1,8 faizi rabitə, 0,5 faizi tikinti, 0,.2 faizi maliyyə sektoru, 11,4 faizi daşınmaz əmlak əməliyyatları (bunun 9,5 faizi yaşayış sahələrinin tikintisinə aiddir), 1,8 faiz səhiyyəyə, 1.4 faiz təhsilə, 4.8 faiz dövlət idarəçiliyinə, 0.3 faiz mehmanxana və restoran biznesinə, 4,4 faiz digər sahələrə yönəldilib.
Büdcədən maliyyələşən obyektlərin tikintisinə 1756,2 milyon manat investisiya qoyulub ki, bu da kapital qoyuluşu üçün 2009-cu ildə dövlət büdcəsinə qoyulan 4718 milyon manat vəsaitin 37,2 faizini təşkil edir.
Müəssisə və təşkilatlar hesabına əsas kapitala 2508 milyon manat (ümumi investisiyanın 48,2 faizi), bank kreditləri hesabına 266,2 milyon manat (5,1 faiz), büdcə vəsaitləri 1895,7 milyon manat (36,5 faiz), qeyri-büdcə fondu vəsaitləri hesabına 338,3 milyon manat (6,5 faiz), əhalinin şəxsi vəsaitləri 190,8 milyon manat (3,7 faiz), digər vəsaitlər hesabına isə 0,4 milyon manat sərmayə qoyulub.
Məqalə müəllifi ilə əlaqə ünvanı: [email protected]
