Azərbaycan, Bakı, 19 oktyabr / Trend /
Dövlət Statistika Komitəsinin məlumatına görə, yanvar-sentyabr aylarında Azərbaycanın nəqliyyat sektorunda 137,7 milyon ton müxtəlif yük daşınıb ki, bu da keçənilki göstəricidən 2,4 faiz çoxdur.
Daşınan yüklərin 72,8 faizi özəl sektorun payına düşür. Yanvar-sentyabrda yüklərin ümumi həcminin 48 faizi avtomobil nəqliyyatı ilə, 33,8 faizi boru kəməri ilə, 11,1 faizi dəmiryol ilə, 7,1 faizi isə dəniz nəqliyyatı ilə daşınıb.
Yanvar-sentyabr aylarında sərnişin nəqliyyatı ilə 975,7 milyon sərnişin daşınıb ki, bu da 2008-ci ilin müvafiq göstəricisindən 7,2 faiz çoxdur. Sərnişindaşımanın 83,3 faizi özəl sektorun payına düşür. Sərnişinlərin əsas hissəsi avtomobil nəqliyyatı ilə (83,4 faiz) və metro ilə (16 faiz) daşınıb.
Dəmiryol nəqliyyatı ilə 15,3 milyon ton müxtəlif yük daşınıb. Keçən il bu göstərici 20,8 faiz olub.
Dəniz nəqliyyatı ilə 9,8 milyon ton müxtəlif yük daşınıb ki, bu da ötən ilin yanvar-sentyabr aylarından 14,8 faiz çoxdur. Daşınan yüklərin ümumi həcminin 74,8 faizi neft və neft məhsullarının, 25,2 faizi isə quru yüklərin payına düşür. Daşınan yüklərin ümumi həcmi beynəlxalq əməliyyatların payına düşür. Yanvar-sentyabr aylarında Azərbaycan limanlarında emal edilmiş yüklərin həcmi 3,8 milyon ton təşkil edir.
Avtonəqliyyatla 66,1 milyon ton yük daşınıb ki, bu da 2008-ci ilin yanvar-sentyabr aylarından 5,9 faiz çoxdur. Sərnişindaşımanın həcmi 6,9 faiz artımla 813,5 milyon nəfər təşkil edib. Sərnişinlərin 96,6 faizi avtobusla, 3,4 faizi isə minik avtomobili ilə daşınıb.
Metropolitenlə sərnişindaşımanın həcmi 9,1 faiz artaraq 156,6 milyon nəfər təşkil edib.
Birinci rübdə hava nəqliyyatı ilə 784,6 min sərnişin daşınıb ki, bunun da 10,2 faizi özəl sektorun payına düşüb.
Yanvar-sentyabr aylarında magistral neft kəmərləri ilə 38 milyon ton neft nəql edilib. 2008-ci ilin müvafiq dövrü ilə müqayisədə bu göstərici 34,7 milyon olub. Nəqliyyatın 75 faizi "Bakı-Tbilisi-Ceyhan" boru kəmərinin payına düşür. Yanvar-sentyabr aylarında bu boru kəmərindən 28,7 milyon ton neft daşınıb.
Yanvar-sentyabr aylarında qaz boru kəmərləri ilə 8,6 milyard kubmetr qaz nəql edilib. Bu göstərici 2008-ci ildən 6,7 faiz çoxdur. 3,8 milyard kubmetr qaz Cənubi Qafqaz qaz kəməri ilə nəql edilib.
Azərbaycan ərazisi üzərindən Avrasiya nəqliyyat dəhlizi üzrə 2009-cu ilin yanvar-avqust aylarında 28,4 milyon ton yük və 134,5 milyon sərnişin daşınıb.
