Azərbaycan, Bakı, 20 oktyabr / Trend , müxbir Ü.İsmayılova/
Azərbaycan əhalisinin sayı oktyabrın 1-də 8,973 milyon nəfər təşkil edib ki, bu da ötən ilin yanvar-sentyabr aylarındakı göstəricidən 76 min nəfər və ya 0,9 faiz çoxdur, bu barədə çərşənbə axşamı Dövlət Statistika Komitəsindən bildirilib.
"Əhalinin sayının artımı həm təbii proseslərin, həm də miqrasiya prosesinin hesabına baş verib", - komitədən bildirilib.
Əhalinin ümumi sayının 49 faizini kişilər, 51 faizini qadınlar təşkil edir. Hər bir kişiyə 1,041 qadın düşür.
Komitədən bildirilib ki, ölkə əhalisinin 23 faizini 14 yaşına kimi uşaqlar, 70 faizini isə 15-dən 64 yaşına kimi şəxslər, yeddi faizini 65 yaşından yuxarı olanlar təşkil edir. 14 yaşından 29 yaşa kimi gənclər əhalinin 31,2 faizini təşkil edir.
Azərbaycanda yanvar-sentyabr aylarında 109,5 min nəfər doğulub, günə 401 uşaq düşür ki, onun da 54,1 faizini oğlan, 45,9 faizini isə qız uşaqları təşkil edir. Onların 1,196 mini əkiz, 18 isə üçüzdür.
Hər min nəfərə doğum sayı səviyyəsi 16,5 faizdən 16,6 faizə kimi artıb, ölüm səviyyəsi isə 6,1 faizdən 6 faizə kimi azalıb.
Doğulan uşaqların ömür uzunluğu 72,7 yaş təşkil edir. Oğlanlar üçün 70 yaş, qızlar üçün isə 75,4 yaş təşkil edir.
Azərbaycanda doqquz ay ərzində 54,6 min nikah bağlanıb. Bağlanan nikahların sayı hər min nəfərə 8,1 faizdən 8,2 faizə kimi artıb.
İlk dəfə nikaha daxil olan kişilərin orta yaş göstəricisi kişilər üçün 27 yaş, qadınlar üçün isə 23 yaş təşkil edir.
Məqalə müəllifi ilə əlaqə ünvanı: [email protected]
