Azərbaycan, Bakı, 29 oktyabr / Trend , müxbir Ü.İsmayılova/
Sentyabrda Bakının ilkin mənzil bazarında bir kvadratmetrin qiyməti avqust ayı ilə müqayisədə 0,8 faiz artaraq 948 dollardan 956 dollara çatıb. Bu barədə cümə axşamı "Əmlak Bazarı İştirakçıları" İctimai Birliyindən yayılan məlumatda deyilir.
"Əsasən ucuz ilkin mənzillərdə qiymət artımı müşahidə edilir", - məlumatda deyilir.
Birliyin mütəxəssislərinə görə, daşınmaz əmlak bazarında qiymətlərin artımına mövsüm dövrü də təsir edib.
Bakıda sentyabr ayı ərzində ilkin mənzillərin orta sahə göstəricisi 121,8 kvadratmetr təşkil edib. Orta blok göstəricisi 4,3 faiz artaraq 2, 4, orta mərtəbə göstəricisi isə 14, 9 mərtəbə təşkil edib.
Ay ərzində Bakının Yasamal (2,6%), Nərimanov (2%), Nizami (1,1%) və Nəsimi rayonlarında (2,8%) qiymət artımı müşahidə edilib.
İlkin mənzil bazarında qiymətlərin azalması isə Bakının Səbayıl (2,9%), Suraxanı (10,6%), Binəqədi (2,8%) və Sabunçu rayonlarında (11,1%) müşahidə edilib.
Qalan rayonlarda isə qiymətlər dəyişməz olaraq qalıb.
Sentyabr ayında Bakıda 154 tikinti şirkəti tərəfindən 456 binanın tikintisi davam edib.
Binaların əksəriyyəti Bakının Yasamal, Xətai və Nəsimi rayonlarında tikilir. Bu rayonlarda tikilən binalar tikilən binaların 63,4 faizni təşkil edir.
Məqalə müəllifi ilə əlaqə ünvanı: [email protected]
