Azərbaycan, Bakı, 10 fevral / Trend , müxbir E.İsmayılov/
Gəncə dairəvi yolunun yenidən qurulması layihəsi çərçivəsində işlər 2011-ci ilin sonuna başa çatacaq. Bu barədə Nəqliyyat Nazirliyindəki mənbə bildirib.
"Bu layihə çərçivəsində işlərin həcmi çox böyükdür, buna görə də gələn ilin sonuna başa çatdırılması planlaşdırılır", - mənbə deyib.
Onun sözlərinə görə, bu layihənin podratçısı Türkiyənin "Polatyolyapı" şirkətidir. Layihənin ümumi dəyəri 74 milyon dollara yaxın qiymətləndirilir. Bu məbləğin 70%-dən çoxu Asiya İnkişaf Bankının payına düşür.
AİB bu layihənin həyata keçirilməsinə 55,4 milyon dollar vəsait ayırıb. Qalan 18,5 milyon dollar Azərbaycan hökumətinin payına düşür.
Yolların uzunluğu 39 kilometrdir. Yolun bu hissəsi Yevlax-Gəncə və Qazax-Gürcüstan sərhədi avtomagistralının sahələrinin bərpası layihəsinə daxildir.
Fevralın 10-na olan rəsmi məzənnə 0,8033 AZN/USD təşkil edir.