Türkmənistan, Aşqabad, 13 fevral / Trend , müxbir H.Həsənov/
Türkmənistan Prezidenti Qurbanqulu Berdiməhəmmədov Hindistana səfər etməyi planlaşdırır, səfərin vaxtı diplomatik kanallar vasitəsilə dəqiqləşdirilir. Bu barədə rəsmi türkmən mənbəsi məlumat verir.
Son hökumət müşavirəsində ölkə başçısı qeyd edib ki, səfər çərçivəsində uzunmüddətli perspektivlərdə Türkmənistan-Hindistan əməkdaşlığının inkişaf məsələləri müzakirə olunacaq.
"Hazırda dünyada bir sıra sahələrdə, o cümlədən yüksək informasiya texnologiyaları sahəsində lider mövqe tutan bu ölkələrin təcrübəsi öyrənilməyə layiqdir", - Berdiməhəmmədov deyib.
Onun sözlərinə görə, Türkmənistan və Hindistan ümumi dərin tarixi və mədəni köklərlə, həqiqi dostluğun sarsılmaz ənənələri ilə, qarşılıqlı anlaşma və etibar ilə bağlıdır".
Bu günlərdə Aşqabadda ticarət, iqtisadi və texnoloji əməkdaşlığa dair Türkmənistan-Hindistan hökumətlərarası komissiyanın növbəti iclası keçirilib.
Tədbirin sonunda Türkmənistan hökuməti və Hindistan Respublikası hökuməti arasında Türkmənistan-Hindistan informasiya texnologiyaları mərkəzi yaradılmasına dair memorandum imzalanıb.
