Azərbaycan, Bakı, 17 fevral / Trend , müxbir Ü.İsmayılova/
Azərbaycanda fevralın 1-nə olan vəziyyətə görə, iqtisadi aktiv əhalinin sayı 4 332,6 min nəfər təşkil edib. Onlardan 4 072,5 min nəfəri iqtisadiyyatın müxtəlif sahələrində və sosial sahədə fəaliyyət göstərirlər. Bu barədə çərşənbə günü Dövlət Statistika Komitəsindən məlumat verilib.
Muzdla işləyən şəxslərin sayı 2009-cu ildə 1376,1 min nəfər təşkil edib. O cümlədən dövlət sektorunda 862,5 min nəfər, özəl sektorda isə 490,6 min nəfər muzdla çalışıb.
Muzdla işləyən işçilərin ümumi sayından 19,7%-i istehsalatda, o cümlədən 12%-i sənaye sahəsində, 4,9%-i inşaatda, 2,8%-i kənd təsərrüfatı, meşə təsərrüfatı və balıqçılıqda fəaliyyət göstərir. Xidmət sahəsində muzdla işləyən işçilərin 25%-i təhsil sahəsində, 19,8%-i topdan və pərakəndə ticarət, avtomobil təmiri sahəsində, 10,2%-i sosial və səhiyyə sahələrində, 6,7%-i nəqliyyat, rabitə, anbar təsərrüfatı sahəsində, 6,3%-i digər kommunal xidmətlərin göstərilməsi, 5%-i daşınmaz əmlakla bağlı xidmət, icarə sahəsində, 4,1%-i dövlət idaretmə və müdafiə sahəsində 2,7%-i digər sahələrdə fəaliyyət göstərirlər.
Rəsmən işsiz statusu alan şəxslərin fevralın 1-nə olan sayı 41 min nəfər təşkil edib. Onlardan 44%-i qadınlardır. Azərbaycanda 5 nəfərə bir iş yeri düşür. Azərbaycanda işsizliyə görə müavinət 173,8 manat təşkil edir.
2009-cu ildə Azərbaycanda 73 613 yeni iş yeri, o cümlədən 54 515 daimi iş yeri açılıb. Yeni iş yerlərinin 13,4%-i yaradılmış müəssisə və təşkilatlarda, 14,6%-i fəaliyyətdə olan müəssisə və təşkilatlarda, 1,4%-i öz fəaliyyətini bərpa edən müəssisə və təşkilatlarda açılıb, 70,6%-i isə fikizi şəxslər tərəfindən yaradılıb.
Yaradılan iş yerlərindən 27,3%-i Bakının, 70,3%-i ölkə regionlarının payına düşür. 91,8% yeni iş yeri özəl sektorda təqdim edilib. Yaradılan iş yerlərinin böyük hissəsi qeyri-neft sektorunda olub: 8,9% inşaat sektorunda, 3,8% topdan və pərakəndə ticarət, avtomobil və motosikletlərin təmiri, 3% emal sənayesində, 1,8% nəqliyyat və anbar təsərrüfatında, 1,7% kənd təsərrüfatı və digər sahələrdə.
Fevralın 17-nə olan rəsmi məzənnə 0,8032 AZN/USD təşkil edir.
