Azərbaycan, Bakı, 01 mart / Trend , müxbir N.İsmayılova/
Yanvarda Azərbaycan Mərkəzi Bankı yanında Azərbaycan İpoteka Fondunun (AİF) xətti ilə Azərbaycan vətəndaşlarına 4,2 milyon manat məbləğində kredit ayrılıb. Bu barədə AİF-in məlumatında deyilir.
Bankların əvvəl verdiyi kreditlərin təkrar maliyyələşdirilməsinin ümumi həcmi 5,3 milyon manat təşkil edib. 2010-cu il Dövlət Büdcəsində İpoteka kreditləşdirilməsinə 14 milyon manat ayırmaq planlaşdırılıb.
AİF-in məlumatına əsasən, Azərbaycanda əhalinin adambaşına düşən ipoteka krediti 17,4 manat təşkil edir, 2009-cu ildə bu göstərici 17,05 manat, 2008-ci ildə 7,34 manat, 2007-ci ildə 5,28 manat, 2006-cı ildə isə 0,2 manat təşkil edib.
Cari ildə əhalinin ipoteka kreditinə olan tələbatının qarşılanması dinamikasının qorunub saxlanılması planlaşdırılır.
AİF standartları üzrə ipoteka kreditləşməsinin ümumi həcmi (2006-cı ilin martından başlayaraq) 162 milyon manata çatıb. 2006-cı ildən bəri fond tərəfindən cəmi 152 milyon manat kredit verilib ki, bu da 3800 ipoteka kreditini maliyyələşdirməyə imkan verib.
Martın 1-nə olan rəsmi məzənnə 0,8034 AZN/USD təşkil edir.
