Azərbaycan, Bakı, 17 aprel /Trend, müxbir N.İsmaylova/
Böyük Britaniya 2010-cu ilin birinci rübündə Azərbaycan iqtisadiyyatına qoyulan investisiyaların həcminə görə lider mövqeyini qoruyub saxlayıb. Xarici investisiyaların ümumi həcmində Britaniyanın payı 50,1 faiz təşkil edib. Bu barədə Dövlət Statistika Komitəsindən deyilib. Britaniya investisiyaları 203,1 milyon manta, xarici investisiyaların ümumi həcmi isə 405,8 milyon manat təşkil edib.
Yanvar-mart ayları ərzində xarici ölkələrin və beynəlxalq investisiya təşkilatlarının Azərbaycan iqtisadiyyatına qoyduğu investisiyanın 90,1 faizi (365,5 milyon manat) Böyük Britanıya, ABŞ, Yaponiya, Norveç, Koreya və Türkiyədən olan investorların payına düşüb.
Amerika investisiyası 73,2 milyon manat (ümumi çəkinin 18 faizi), Yaponiya 38,34 milyon manat (9,4 faiz), Norveç 23,82 milyon manat (5,9 faiz), Fransa 538,4 min manat (0,1 faiz), Türkiyə 18,88 milyon manat (4,7 faiz), Koreya 8,17 milyon manat (2 faiz), Rusiya 1,94 milyon manat (0,5 faiz), Çexiya 1,77 milyon manat (0,5 faiz), BƏƏ 390,6 min manat (0,1 faiz), Səudiyyə Ərəbistanı 1,923 milyon manat (0,5 faiz), Avstriya 495,1 min manat (0,1 faiz) təşkil edib.
Beynəlxalq Maliyyə İnstitutlarından ən böyük həcmli investisiyanı Dünya Bankı yatırıb - 28,098 milyon manat (ümumi çəkinin 6,9 faizi). Azərbaycanda layihələrin reallaşdırılması üçün Asiya İnkişaf Bankı 3,276 milyon manat (0,8 faiz), İslam İnkişaf Bankı 1,749 milyon manat (0,4 faiz) yönəldib.
Aprelin 17-nə olan rəsmi məzənnə 0,8035 AZN/USD təşkil edir.