Azərbaycan, Bakı, 23 aprel /Trend, müxbir Ü.İsmayılova/
Martda Bakının tikinti materialları bazarında qiymətlər 19,84% bahalaşıb. 2010-cu ilin əvvəlində qiymətlər 13,1 faiz, ötən ilin analoji dövrünə nisbətdə isə qiymətlər 63,9% artıb. Bu barədə cümə günü "Əmlak Bazarı İştirakçıları" İctimai Birliyindən məlumat verilib.
"Qiymətlərin artmasına tikinti mövsümünün başlaması təsir edib", - məlumatda deyilir.
Tikinti materialları bazarında qiymətlərin artmasına səbəb ötən ay 14 adda tikinti materialının bahalaşması olub ki, bu da seqment bazarının portfelinin böyük hissəsini təşkil edir.
Martda təşkilatın mütəxəssisləri 38 adda 89 növ inşaat materialı üzrə monitorinq keçiriblər. Yerli istehsal olan tikinti materiallarının payı 53,9 faiz təşkil edib.
