Azərbaycan, Bakı, 26 aprel /Trend, müxbir N.İsmayılov/
İtaliya Azərbaycan ilə iqtisadiyyatın müxtəlif sahələrində əməkdaşlığın genişləndirilməsində maraqlıdır.
"Biz Azərbaycan ilə xüsusi biznes, neft sektoru sahələrində əməkdaşlıq edirik və iqtisadiyyatın digər sahələrində əlaqələri möhkəmləndirmək istəyirik. Ümid edirik, sahibkarlar arasında əməkdaşlığın yaradılması istehsal və infrastrukturun inkişafına təkan verəcək", - bu barədə İtaliya iqtisadi inkişaf nazirinin müavini Adolf Urso bazar ertəsi Bakıda bildirib.
Onun sözlərinə əsasən, İtaliyanın təcrübəsi Azərbaycanda turizmin inkişafına da töhfə verə bilər.
"Biz ABŞ və Fransadan sonra Azərbaycan üçün birinci ixrac ölkəsi ola bilərik. Həmçinin, neft ixrac edən ölkə kateqoriyasından Azərbaycanda sərmayə yatıran ölkə kateqoriyasına keçmək istəyirik", - nazir müavini bildirib.
Bununla yanaşı İtaliya şirkətləri neft hasilatı və ixracı sahəsində maraqlarını göstərir, Yunanıstan və Türkiyədən qaz kəməri vasitəsilə İtaliyaya Azərbaycan qazının nəqlini nəzərdə tutur.
İqtisadi inkişaf nazirinin müavini Adolf Urso 40 nəfər sahibkardan ibarət İtaliya nümayəndə heyətinə rəhbərlik edir. Onlar bazar ertəsi Bakıda keçirilən birgə biznes-forum zamanı gələcək iqtisadi əməkdaşlıq haqqında müqavilə imzalayıblar.
