Gürcüstan, Tbilisi, 28 aprel /Trend, müxbir N.Kirsxaliya/
İqtisadi inkişaf naziri Şahin Mustafayevin və nəqliyyat naziri Ziya Məmmədovun rəhbərliyi ilə Azərbaycan hökumət nümayəndə heyəti aprelin 29-da Tbilisiyə səfər edəcək.
Gürcüstanın İqtisadiyyat Nazirliyindən Trend-ə verilən məlumata görə, ilkin məlumata əsasən, Azərbaycan nümayəndə heyəti Tbilisidə Baş nazir Nika Gilauri, iqtisadiyyat naziri Zurab Pololikaşvili və digər rəsmi şəxslərlə görüşəcək.
Rəsmi görüşlər zamanı iqtisadiyyat və nəqliyyat sahəsində Gürcüstan - Azərbaycan əməkdaşlığı müzakirə olunacaq. Hazırda səfərin gündəliyi müzakirə olunur.
Səfər çərçivəsində Gürcüstan - Azərbaycan biznes-forumu keçiriləcək. Həmçinin, Azərbaycanın ÜTT-yə daxil olması prosesi çərçivəsində Gürcüstanla ikitərəfli danışıqların başa çatdırılması haqqında protokolun imzalanacağı gözlənilir.
Nümayəndə heyəti azərbaycanlıların yaşadıqları Marneuli rayonunda olacaq, yerli biznesmenlərlə görüş keçirəcək.