Azərbaycan, Bakı, 26 may /Trend, müxbir Ü.İsmayılova/
Respublikanın aran (mərkəzi) hissəsində baş vermiş təbii fəlakət Bakıda daşınmaz əmlak bazarının qiymətlərinə və aktivliyinə təsir etməyib. Bu barədə "MBA Group konsaltinq" şirkətinin baş direktoru Nüsrət İbrahimov bildirib.
"Baxmayaraq ki əhali arasında bu zonadan paytaxta güclü axın barədə şayiələr gəzir, bu doğru deyil", - İbrahimov deyib.
Onun sözlərinə görə, ola bilsin, bazarın bəzi iştirakçıları mənzillərin kirayə verilmə haqqını artırmaq üçün yaranmış vəziyyətdən istifadə edirlər; lakin bu gün bazarda ciddi dəyişikliklər müşahidə edilmir.
Ekspert hesab edir ki, şayiələr bazara yalnız "psixoloji təsir" göstərə bilər. Lakin indi və yaxın aylarda bu hələ ki gözlənilmir. Çünki mənzillərini itirmiş əhalinin bir hissəsi xüsusi çadır-şəhərciklərində yerləşdirilib.
Son həftələr ərzində yağan intensiv yağışlar nəticəsində, Kürün məcradan çıxması və digər çaylarda daşqınlar səbəbindən 40 rayonun ərazisində subasma halları qeydə alınıb. Bu təbii fəlakət nəticəsində 20 minə yaxın ev su altında qalıb, 300-dən çox ev dağılıb, 2 min ev qəzalı vəziyyətdədir və 50 min hektar əkin və örüş sahələrini su basıb.
